Shillong, Risaw 01: Ki Nonghikai skul kiba don hapoh ka lama jong ka All Meghalaya SSA School Teachers Association (AMSSASTA) ha ka sngi Ba-ar, kila sdang ia ka jingiakhih da kaba iashong kyllain mungor ba khlem pud ban pyrshha ia ka jingbym lah jong ka Sorkar ban pynkiew ia ka tulop jong ki ha kine ki phra snem.
Ia kane ka rai la shim hadien ba kut noh ka jingaipor ba 19 sngi ia ka Sorkar Jylla, kaba la kot ha ka sngi Nyngkong ka 30 tarik u Nailur.
Ka Association kala dawa ban pynkiew haduh 100 percent ka tulop jong ki palat 12541 ngut ki nonghikai SSA hapoh ka Jylla naduh u snem 2019.
“Ngi la rai ban pyniaid shakhmat ia ka jingiakhih da ka jingiashong kyllain mungor ba khlem pud hadien ba u Myntri ka Tnad Pule Puthi Rakkam A Sangma ula pyntip sha ngi (ha ka jingialang hynnin ka sngi bad u) ba ka Sorkar kan dang ban shim ia kano kano ka rai halor ka jingdawa bala buh da ki Nonghikai SSA ban pynkiew tulop 100 %” ong u General Secretary ka Association Wanpyndaphi Lapang haba iakren bad ki nongthoh khubor ha madan Malki.
“Ka Sorkar kala pynkiew khatduh eh ia ka tulop jong ngi ha u 2016. Hadien 3 snem kata ha u 2019, ngi la kyrpad biang ia ka Sorkar ban pynkiew ia ka tulop jong ngi hynrei phra snem kila iaid, ka jingkyrpad kala poi sha ki skhor ba kylleng, kaba pynbor ia ki nonghikai ban mih sha surok ha ka ban dawa iala ka jong ka hok” ula ong.
U Wanpyndaphi ula ba ka jingleh kmie nah jong ka Sorkar kala ktah bha ia ki nonghikai SSA namar kila shem jingeh ban pyndap ia ki jingdonkam ba manla ka sngi jong ka Iing ka sem jong ki nalor ka jingkiew dor ki marbam mardih.
Halor ka rai jong kawei pat ka seng ki Nonghikai SSA-ka Meghalaya SSA School Association (MSSASA) ban buddien ia ka jingdawa ha kaban shimti noh ka Sorkar ia ka jingshakri ki nonghikai SSA, u Wanpyndaphi ula ong ba ki heh Ophisar ka Tnad Pule Puthi kila kyntait ba ka don kum kata ka jingthmu na ka Sorkar Jylla.
“Hadien ba ngi iohi ia ki khubor halor kane ka kam, ngi la leit iakynduh ia u State Project Director, SSA bad Commissioner & Secretary ka Tnad Pule Puthu ban dawa ia ka jingpynbna da ka jingthoh halor kane ka sienjam jong ka Sorkar ban shimti noh ia ka jingshakri ki nonghikai SSA. Ha ka jingialang, baroh kine ki Heh Ophisar kila kyntait ia ka khubor bad kila pyntip ha ngi ba ka Sorkar ia mynta kam lah ban shimti ia ka jingshakri ki nonghikai SSA. Halor kane, ngi la rai ban bat iala ka jong ka jingdawa ban pynkiew 100 percent ia ka tulop” ula ong.
