Phah shithi ka Sorkar sha ka Tnad Defence ban ia jaka
Shillong, Nailur 27 : U Chief Secretary ka Jylla Bah D.P Wahlang hynne ka sngi Thohdieng, ula pynpaw ba ka Sorkar Jylla ka lah ban mynjur ha kaban pynkynriah noh ia ki 342 tylli ki Longiing ka Them Metor sha ka jaka shipai kaba don markhap bad ka Them Iew Mawlong.
Kane kala mih hadien ka jingiakren bad ki Nongialam ka Shiromani Gurdwara Parbhandhak Committee (SPGC) bad ka Save Shillong Sikh (SSS), kiba la wan na Amritsar, Punjab ban pynpaw ia ka jingsngewkhia halor ka jingpynpra noh ia ka Gurdwara kaba don ha Them Metor.
Haba iakren bad ki nongthoh khubor, u Chief Secretary ula ong “Hooid, nga la shong jingialang bad ki Heh ka Harijan Committee kynthup ki dkhot ka SGPC, kiba la wan naduh Amritsar. Kila pynpaw ba ka long kaba eh ia ki ban pdiang ia ka jingtyrwa ka Sorkar ban pynpra ia ka Gurdwara kaba don ha Them Metor bad kyrpad ia ka Sorkar Jylla ban wad da kawei pat ka lad ka lynti”.
U iathuh ba hadien ka jingiakren kaba bniah bha, la shem ia ka lynti kata da kaba kyrpad ia ki bor shipai ban ai jaka. “Kumta, ngi la rai ban thoh sha ka Tnad shipai ba lada long kaba lah, ban ai katto katne ka jaka kaba don markhap ka Them Metor”.
“Kane kan ailad ia kine ki nongshongshnong ban shna hi iala ki jong ki Iing, kan iarap iaka Sorkar ban tyngkai ia bun bah ka pisa kaba lah ban lut ha ka jingpynkynriah ia ki sha European Ward. Lada ngi ioh ia ka jaka, ka Gurdwara ruh kan neh beit ha kajuh ka por bad ia ka jaka ba sah, yn sa shimti noh da ka Sorkar ban pynroi”.
Haba kylli, u Bah Wahlang u pyntip ba ka Sorkar kala dep ban phah ia ka shithi sha u Defence Secretary ka Sorkar Pdeng bad shen, kan sa don ruh ka jingialang High Level hapdeng u Myntri Rangbah ka Jylla bad u Myntri ka tnad iada ri.
“Ki Sikh kiba wan na Punjab ruh kila kular ia ngi ba kin pyrshang katba lah ban pynkohnguh ia ki bor shipai ba kin ai ia ki katto katne ki jaka” ula iathuh.
Hynrei u Chief Secretary ula pynkren shai ba watla kane ka jingiakren ka dang iaid, ka jingpynkynriah ia ki 342 tylli ki Longiing na Harijan Colony ka dei ka bym pat pynjlan satia.
“Kam pat don ka jingpynsangeh ia ka jingpynkynriah” ula ong.
Ula ong ba lad aka Sorkar ka ioh ia ka jaka na ki shipai, kine ki Longiing kin ym donkam shuh ban leit sha European Ward. “Yn shu pynkynriah ia ki sha ka jaka ba thymmai kaba don sha shiliang ka surok bad kine ki Longiing kin sa pynlut hi ia ki jingtei baroh. Kane ka dei ka kular bala ai da ka SGPC bad kiwei, kiba iakhun ia ka jingeh jong kine ki Longiing”.
