Yn ai jingmynjur ka Sorkar ia ka jingtyrwa thied jaka ba 22 acre
Shillong, Nailur 23 : Ka Sorka Jylla kala rai ban phah weng noh na ka Sorkar Pdeng ia ki katto katne ki kyndon khnang ba kan plie lynti ha ka jingpynheh ia ka kad liengsuin Shillong Airport.
Ka Kynhun Myntri ka Jylla kan sa shong jingialang ha ka sngi Balang ban ai jingmynjur ia ka jingtyrwa ban thied shuh shuh ia ka jaka ba 22 acre na ka bynta ban ka project ban pynheh ia ka kad khnang ba ki liengsuin kiba heh kin lah ban wan hiar ha kane ka kad liengsuin ka Jylla.
Ia kane la pyntip da u Symbud Myntri Rangbah ba khmih ia ka Tnad Transport Bah Sniawbhalang Dhar ha ka jingleit jurip ia ka Shillong Aiport hynne ka sngi Thohdieng.
Ula lum ruh ia ka jingialang bad ki Heh Ophisar na ka Tnad Civil Aviation Ministry bad ka Airport Authority of India. Kiba iadonlang ki kynthup ia u Chief Secretary, u Commissioner & Secretary ka Tnad Transport bad ki Heh Ophisar ka Tnad.
“Ka Sorkar Jylla kala shimkhia bha ia ka jingpynheh ia ka Shillong Airport” ong u Bah Sniawbha haba iakren bad ki nongthoh khubor hadien ka jingialang.
“Ngi la ioh pdiang ia ka kaiphod kaba ar na ka Airport Authority of India (AAI) kaba pynpaw ba ka lynti ka don (ban pyniar ia ka runway jong ka kad) hynrei ki don pat katto katne ki jingwit, kiba hap ban iakren bad ka Sorkar India hashuwa ban pyniaid shakhmat ia ka project ban pynheh ia kane ka kad” ula ong haba bynrap “Kine ki iatakhuh bad ki katto katne ki kyndon, ha kaba ngi donkam ia ka Sorkar India ba kan pyllait noh ia ngi khnang ban gin lah ban wanrah ia ki liengsuin kiba heh ba kin hiar ha Shillong Airport”.
Haba kylli, u Symbud Myntri Rangbah ula ong “Lada ka Sorkar India kam pyllait ia ngi na kine ki kyndon, ka jinglut kan dei kaba bun bha ia ngi ba ngin pynlut. Lada ka pyllait, ngi lah ban pynheh ia ka kad tang hapoh ki khyndiat snem naduh mynta”.
“Nalor kata, kat kum ka sorjamin ba khatduh, ngi kwah ban iaid lait ia u lum bad kumta ngin hap ban pyniar ia ka runway-900 meter hapoh ka jaka lajong. Lada ngi hap mait ia u lum, ka jinglut kan kot ia palat T.8000 klur. Hynrei ki don katto katne ki kyndon, ngin sa kyrpad ia ka Sorkar pdeng ba kan pyllait noh ia ki khnang ban plie lynti ia ka jingpynheh ia ka runway jong ka kad”.
U Bah Sniawbha u pyntip ruh ba ka Sorkar ka donkam ban hap thied jaka sa 22 acre na ka bynta ban pynhreh ia ka project ha kaba 16 acre kan long ia ki bynta jong ka jingshngain bad 6 acre ban pynlong kum ki jaka pynieng ia ki liengsuin kiba heh.
“Haba iadei bad kane, lashisngi, ngin sa shong ia ka jingialang ka kynhun myntri ban ai jingmynjur ia ka jingtyrwa bad ngin sa pyniaid shakhmat ia ki kam bad ka Sorkar India” ula ong.
Halor ka jingkylli, u Bah Sniawbha ula ong “Kat kum ka plan, kumba T.500 klur yn pynlut da ka AAI bad ka jingthied jaka kan dei kaba pynlut da ka Sorkar Jylla”.
“Lada dep ban leh lut ia kine, ka kad kan sa treikam 24×7 bad ka lah ban iarap pynioh kami a 300-400 ngut ki briew” ula bynrap.
