Shillong, Nailur 19: U Lamphang ka Iingdorbar thawain ka jylla u Thomas A. Sangma, hynne ka sngi Palei, ula lum ia ka jingialang bishar kam bad pynlong ruh ia ka jingjurip ia ka jingtei jong ka Iingdorbar thawain ba thymmai ka jylla ha Mawdiangdiang.
Ha katei ka jingjurip la pynlong da ka jingthmu ban peit iaka jinglong jingman bad ban pynthikna ba dei ban pyndep ia ka projek ha ka por kaba la buh. U Dr. Andrew Simons, Commissioner & Secretary ka Meghalaya Legislative Assembly ryngkat bad ki ophisar na ki tnad sorkar bad ka Assembly Secretariat kila iadonlang ha katei ka jingialang bad jingjurip.
“Mynta ka sngi ngi la pynlong ia ka jingia jurip lang ia ka jingtei jong ka Meghalaya Legislative Assembly kaba thymmai bad ban peit bniah ia ka jingiaid jong ka kam. Ngi la lap ba ka jingiaid ka kam ka long kaba biang watla kala don ka jingsuki, hynrei haba peit ha baroh hi ka jingiaid ka kam ka long kaba ihun” ong u Lamphang.
Ka mat kaba hakhmat eh jong katei ka jingialang bishar kam ka long ban pynthikna ba ia ka jingtei bad ia ki sawdong sawkun ki dei ban iadei bad ka mei mariang.
U Lamphang ula ong “Nga la khot ia baroh ki tnad kum ka tnad Forest bad Horticulture, ba kin peit ba ha katei ka jaka baroh kawei, kadei ban long kaba jyrngam katba lah. Ngi kwah ban pynneh ia ka jingjyrngam kat kaba ngi lah”.
Nalor kane, u Lamphang ula bthah iaka tnad Arts and Culture ban shna bad pynwandur bha iaki lynti ban leit sha ka dorbar, ki lynti iaid bad ka jaka pdiang briew.
“Ha ka mala kaba nyngkong, kin pyrshang ban pyni ia ki khana jong ka jylla Meghalaya ha ka jaka pdiang briew ne Reception Area jong ka Legislative Assembly bad ha ka mala kaba shapoh kin pyrshang ban pyni iaka histori jong ka Meghalaya Legislative Assembly ha kine ki 50-51 snem kiba la leit” la ong u Thomas.
Haba kren halor ka jingtreikam ki nongbylla, u Lamphang ula ong, kham mynshwa ula pynpaw ia ka jingsngewkhia halor ka jingduna palat ki nongtrei hynrei ula pynpaw pat ia ka jingsngewhun hadien ba kala don ka jingpynkylla thymmai.
“Mynshwa ka jingtreikam ki nongtrei kam long kaba biang. Kila don tang katto katne ngut ki briew ha ka jaka trei, hynrei mynta kila don ki briew ha ki jaka trei bad bun kin dang wan shuh. Kumba phi lah ban iohi hadien ka jong nga, kabynta jong u ‘Dome’ kaban tap ia ka iingdorbar ka dang don hapdeng ka jingtei. Kum kine ki kamki donkam ia ki nongtrei kiba tbit bad kibashemphang ia ka kam bad shiteng na ki kila don ha ka lynti bad mynta ka sngi kin sa wan shuh shuh bunngut ki nongtrei. Naduh la shai ne la shi sngi, ki lah ban sdang treikam pura noh”.
Ha ka jingialang ban khmih bniah, u Lamphang ula pynpaw ba kala don ka jingiaid shakhmat jongka kam, hynrei ka jingtrei baroh ka dang don pat shadien na kaei kaba la khmih lynti.
La buh por ba dei ban pyndep ia katei ka projek hapoh ka 30 tarik u Nailur 2024.
“Nga kwah ban iohi ba dei ban pyndep kloi noh ia katei ka jingtei. Ka jingai por kaba nyngkong ka long ha ka 30 tarik u Nailur. Ngi dang sah shadien ban pyndep ha ka por, lehse kin dang donka msa shi bnai ban noh ia katei ka kam”.
