“Haba ka masi ka sngewsih, kam mih beit ka jingeh ha ka pyrthei” ong u monk Hindu ha Assam

Shillong, Nailur 19: “Haba ka masi ka sngewsih, kan mih beit ka jingeh ha ka Pyrthei. Haba ka masi ka shitom, ka pyrthei ka jynjar.” Kane ka dei ka jingkren da u Shankaracharya Govardhan Peeth, u Swami Adhokshajanand Devtirtha, u ba lamkhmat iaka jingialap ban khang ïa ka jingpynïap masi bad bam doh ha ka Ri baroh kawei.

Haba kyrpad ban khang ïa ka jingpynïap masi ha kylleng ka Ri, u Swami Adhokshjanand Devtirth, u ba dang don ha Guwahati u la ong “Haba u masi u sngewsih te ka don ka jingeh ha ka pyrthei. Haba ka Masi ka shitom, ka pyrthei ka jynjar. Dei na kata ka daw ba u Blei u la wan ban iada ia ka masi. Ka long ruh kaba kongsan ïa kawei ka Jylla ban ïada ïa ki masi bad ban burom ïa ki da ka Sorkar Synshar jong ka jylla.”

U Nongialam ka seng Hindu u la ïaroh ruh ïa ka jingtrei shitom jong u Myntri Rangbah ka Assam u Himanta Biswa Sarma u ba la lah ban khanglad ïa ka jingshalan tuh ïa ki masi sha Bangladesh na Assam.

“Nga ai khublei ia u Myntri Rangbah ka Assam u ba la pynsangeh ia ka jingkhaii tuh ia ki masi ha ka por hadien ba u la wan ha ka bor, namar kham mynshwa ia ki masi na Assam la shalan tuh sha Bangladesh hynrei mynta ka la sangeh noh” u la ong.

U Swami Adhokshjanand Devtirth u ba la leit sha ka jingialang ha Shree Shree Rudra Mahayogya bad Kameswari Maha Aaradhana ha Guwahati ruh u la iathuh ba ki briew ha Assam mynta ki la ri masi bad kane ka jinglong ka la nang kiew.

“Ki myntri bad ki nongthaw ain ka Assam ruh ki pyniaid ia ki gaushala. Ka jingaiti bad jinglong bashisha ia ka masi ka la nang kiew,” u la bynrap.