Tura, Nailur 19: Kawei ka jingjia trei torti jong ki doktor kala mih pyrthei ha kawei na ki shnong nongkyndong ka Ri-lum Garo, ha la kynnoh ba kawei ka doktor kala ieh ia ka bandage hapoh ka kpoh jong ka nongpang hadien ba la dep ban puid.
Kawei ka seng kala buh da ka jingujor ban leh eiei pyrshah ia kane ka doktor. Kane ka nongpang kala hap ban shah ia ka jingpang jingthar da ki bnai bad ka hap ban leit phah puid biang ban weng noh ia kane ka bandage.
Kane ka jingjia kala jia ha ka 29 tarik Kyllalyngkot 2024. Kane ka nongpang ka kyrteng ka Mensila N Marak, ka nongshong shnong ka Lower Nengsa, North Garo Hills, kaba la leit phah sumar ha Jengjal Sub Divisional Hospital ban phah puid jingpang.
“Hadien ka jingpuid, la shem ba ka doktor Suzie Paul Francis kala ieh ia ka bandage hapoh ka kpoh jong ka Mensila. Kane ka jingbakla ym tang kala pynlong ia kane ka nongpang ba kan suh kan thar hynrei kaba pynlong ia ka nongpang ban pang jur” kynnoh ka A’chik State Peoples’ Front (ASPF).
Ha ka ASPF ha ka sngi ba-ar kala leit buh da ka jingujor hakhmat ka Myntri ka koit ka khiah Kong Ampareen Lyngdoh bad dawa ban leh eiei pyrshah ia kane ka doktor.
“Ngi dawa ban tohkit mardor ia kane ka kam ban pynshisha ia ka jingtrei torti bad ban tynrong ia ka jingkitkhlieh ha ka Dr Suzie halor kane ka kam b aka leh” ong ka ASPF ha ka shithi ujor sha ka Myntri.
Ha kajuh ka por, ka Medical Director ka Jengjal Sub-Divisional Hospital, ha ka shithi ba 6 tarik Jylliew, 2024, kala shim ia ka jingkitkhlieh ban siew ia baroh ki jinglut jingsep ban phah puid, kynthup ka jinglut ha ka snam bad kiwei kiwei, ha kaban sumar ia ka Mensila Marak.
