Shillong, Nailur 17 : Ka Myntri ka Koit ka Khiah Kong Ampareen Lyngdoh ha ka sngi Ba-ar, kala ban jur ba ki samla pule kiba leit pule MBBS na ka bhah pule ka Sorkar Jylla, kin hap wan phai sha Meghalaya ban shakri ia ka Jylla hadien ba ki pyndep ia ki jingpule.
Haba iakren bad ki nongthoh khubor, ka kong Ampareen kala kren halor ka jingduna jong ki doktor specialist hapoh ka Jylla bad ban jur ia ka jingdonkam ban pynurlong ne pyntreikam ia ki kyndon jong ka jingiateh bond ban leit pule ia ki kyrdan pule bala bei pisa da ka Sorkar.
Ka Myntri kala pynpaw ia ka jingsngewkhia halor ka jinglong mynta ba bun ki samla ba pass MBBS kim shym la wanphai shuh sha Jylla hadien ba ki pyndep iala ki jingpule bad kular ba ka Sorkar kan sa leh eiei halor kane ka bynta ban pynthikna ba kine ki samla kin burom ia ka jingiateh kular.
“Ka dei ban long kongsan ba baroh ki samla pule doktor kiba ioh leit pule na ka bhah ka Jylla Meghalaya, ba ki dei ban wan phai biang shala ka jong ka Jylla” ong ka Myntri haba bynrap “Ngi donkam ban pyrkhat bha halor kane. Ngi donkam ban iashong bad ka Sorkar India, ngi donkam ban iashong bad ki Jylla bapher bapher kaba ki samla pule jong ngi ki leit pule”.
Kat kum ka jingong jong ka, ka Jylla Meghalaya kala ioh haduh 95-96 tylli ki medical seat ban ai bhah pule ia ki samla ka Jylla.
“Ka jingdon ki nong aplai kala nang kiew. Bun ki nongshongshnong ka Meghalaya kila leh bha bha ha ka eksam NEET. Kumta, kan sa don ka jingiaknieh kaba jur bha” kala ong.
Ka Myntri ka bynrap ba haba tih jylliew ia kaei ka daw ba ki doktor kiba ioh leit pule na ka bhah ka Sorkar kim ju wan phai shuh sha Jylla, kala ong ba ka Jylla Meghalaya haduh mynta kam pat don satia ia ka Medical Council bad kane ka dei ka jingeh ba nyngkong duh.
Lah ban kdew hangne, ha ka 9 tarik Naitung 2024, ka Sorkar Jylla kala pynbna ia ka rai ban bishar thymmai ia ka bond policy ban lah leh eiei halor ka jingduna doktor hapoh ka Jylla.
Ka Myntri ka pyntip ba ka Tnad kala iakren bad iamir jingmut bad ka Tnad Ain ban bishar bad jngoh bniah biang ia ka bond policy ban lah pynthikna ba ki doktor bad ki samla pule kin wan phai ban shakri ia ki paidbah ka Jylla Meghalaya.
Nalor kane, ka kong Ampareen kala pynbna ba ka batch ba nyngkong jong ki samla ban pule doktor ha Meghalaya kan sa sdang ha u snem 2025, kum shibynta jong ka jingpyrshang jong ka Sorkar ban pynkhlain iaka jingdon doktor ha Jylla.
