Shillong, Nailur 08 : Ka seng Bharatiya Janata Party (BJP) kala rai ban pynieng kyrtong ha ka elekshon MDC kaban sa wan, jong ki 3 tylli ki Autonomous District Council ha Khasi, Jaintia bad Garo Hills jong ka jylla
“Ngi ngin iakhun ha ka elekshon ban wan ha ki 3 tylli ki District Council – KHADC, JHADC bad GHADC. Hynrei ngim pat long thikna pat, la ngin pynieng kyrtong ha baroh 29 tylli ki Constituency ha man la ki District Council,” ong u nongialam ka BJP bad u Myntri Sorkar ka jylla u Bah AL Hek.
“Ka rai halor kane ka bynta kan shong ha ka jingdon ia ki kyrtong” ula bynrap.
U Bah Hek ula ong ba ka jingai tiket ia ki kyrtong yn pynshong nongrim ha ka jinglah ka jongki ban jop ia ka elekshon.
“Lem kumta, ngim lah ban shu ai tiket ia uno uno ne ia baroh” ula ong.
Ki tyllong khubor kila iathuh ba ka elekshon jong ka KHADC, JHADC bad GHADC lah ban pynlong lang ha kajuh ka por.
