Nongstoiñ, Nailur 08: Ki nonghikai SSA (Sarva Shiksha Abhiyan) kiba don hapoh ka shatri All Meghalaya SSA School Teachers Association AMSSASTA), kala byrngem ban pynlong noh ia ka jingiakhih ba khlem buh por mynta u bnai namar ka jingiai mynthi jong ka Sorkar haba iadei bad ki mat jingdawa.
Ka AMSSASTA kala shim ia kane ka rai ha ka jingialang ba long ha ka 7 tarik nailar ha Mount Hermon Secondary School, New Nongstoin, kaba la wan iashimbynta da ki Nonghikai SSA na Ri-lum Garo kiba don hapoh ka All Garo Hills SSA School Teachers Association, ki nonghikai na West Khasi Hills, Ri-Bhoi, Jaintia Hills, South West Khasi Hills bad kiwei kiwei.
Haba kren sha ki lad pathai khubor hadien ka jingialang, u President ka AMSSASTA Bah Peter Thyrniang ula ong ba ki nonghikai SSA kila dep pynsngew la slem ia ki jingeh bad ki jingdawa sha ka Sorkar kynthup naduh u Myntri Rangbah bad Myntri ka Tnad Pule Puthi hynrei haduh mynta kim pat ioh satia ia kano kano ka jubab kaba shai.
Ula pyntip ba hadien ka jingiamir jingmut kaba sani bha, ki nonghikai SSA kila shim ia ka rai ban pynlong biang noh da ka jingiakhih ba khlem buh por mynta u bnai katba ka Sorkar kam pat ai ia ka jubab kaba pynhun ia baroh.
U Bah Thyrniang ula kyntu ia baroh ki nonghikai SSA ba kin iaklet noh ia ki jingsngew iapher kynhun ne Association hynrei ban iatylli bad iapynkhreh ban iashimbynta lang ha ki jingiakhih ynda la dep pynbeit ia ka por.
