Imphal, September 7: Hynriew ngut ki briew kila iap ha ka jingkhie biang ki kam umsnam ha Manipur, kaba la wan jia hadien ka jingshah pyniap uwei u tymmen ha ka sngi Thohdieng bad kum ka jingpynphai kylliang ia ka jingiap ki 4 ngut ki kaikhlaw Kuki kiba shah siat iap ha Jiribam.
Ka jinglong jingman ka dang long kaba shong synjor bha namar ba ka Jiribam kala dei ka thaiñ thymmai jong ki jingïaleh thma kaba la nang pynjur ia ka jingiakynad pher jaidbynriew hapdeng ki Meitei bad ki Kuki-Zo.
Kat kum ka khubor, ka jingjia umsnam ba thymmai ka dang shu jia ha ka Shnong Serou, Moljol, Rashidpur bad Nungchappi, kiba hap hapoh ka Jiribam District,kaba don ha khappud ka Assa.
Hadien ki kam umsnam, ka kynhun ki shipai Assam Rifles bad kiwei ki bor pahara ka Sorkar Pdeng lem bad ki Pulit Commondo ka Manipur, kila hiar sha baroh ki jaka ba khie biang ki kam umsnam kiba jia naduh ka step sngi Saitjain.
Ka Sorkar Manipur kala hukum ban khang dam shuwa ia baroh ki jaka pule hapoh ka Jylla ha ka sngi Saitjain bad bthah ia ki bor pahara ba kin long kiba peitngor bha.
Haka sngi Thohdieng, uwei u tynmen bala 78 snem ula shah pyniap bad 6 ngut kiwei pat kila mynsaw ha ka jinghiar thma jong ki kaikhlaw Kuki ia ka Iingsah u Myntri Rangbah barim ka Jylla Mairembam Koireng kaba don ha Bishnapur District, da kaba kawang da u bomb uba khlain bor bha.
Kat kum ka jingong ki Pulit, une u bomb uba la kawang na ka jaka kaba jngai, ula hap hapoh ka phyllaw jong ka Iingsah u Myntri Rangbah barim, bad shim ia ka jingim une u tynmen, uba la khlad hashen.
