Shillong Nailur 05: Ka North-Eastern Regional Agricultural Marketing Corporation (NERAMAC) hynne ka sngi Palei, kala pynlong ia ka jingïalang kaba ar sngi kaba la ai kyrteng “Promotion of Millets Production in India” da ka jingthmu ban kyntiew ia ka kam rep krai bad ban pynsngewthuh ïa ki jingmyntoi na ka jingbam ïa u krai.
U Bah B.K Sohilya, uba long u Nongaibuit bad u Chairman ka Meghalaya Farmers Empowerment Commission haba ai kren ha ka jingialang ula ban jur ia ka jingdonkam ban pynsngewthuh paidbah ia ka jingpynmih ia u krai. Ula ong ba u krai udei u jingbam uba bha tam, ha ka jingmut kaba shisha bad dei ban pyniaid iew bha ia u na ka bynta ka jingmyntoi jongki nongrep.
Ula iaroh ia ka jingtrei shitom jong ka NERAMAC bad ula kyntu ba dei ban don ia ka jingiatreilang bad ki tnad treikam khnang ba yn lah ban don ia ka jingpynmih kaban long kaba seisoh.
U Rajiv Ashok (Retd), Managing Director ka NERAMAC ula batai ia ki jingmyntoi jong ki jingpynmih lyngba u krai bad ka daw ban pyndonkam ia u ha ka jaka jongu khaw. Ula kren ruh ha kaba iadei bad ka jingthmu jong ka sorkar India halo rune u marrep ha kine ki snem kiba la leit kaba la lam ban ioh ia ka jingithuh ha ka pyrthei kum ka International Year of Millets.
U M Iboyaima Meitei, Horticulture Adviser, NEC, ula iaroh ia ka jingshimkhia jongka NERAMAC ha kaba iadei bad ka rep ka riang bad ban kyntiew khamtam eh ia u krai. Ula ong ba ka jingpyntreikam ia ka FPO Central Sector Scheme da ka NERAMAC kadei kaba la leh ha kata ka lynti kaba biang bad ula kdew ruh ba ka NEC kala ai ia ka jingkyrshan kaba pura ia ki jingpyrshang ne ki kam ki jam kiba iadei bad kane ka bynta.
U Kayio Kayina, MD NERCORMS, ula pynpaw ba u krai u long shi bynta ha ka rukom bam jong ki longshwa manshwa bad ka long kaba kongsan ban pynneh pynsahbad ban kyntiew na ka bynta ka jingshngain ha ka jingpynmih ia ki marbam bad khamtam ha kaba iadei bad ka jingtei jong une u marbam.
Ka Kong J.C Lyngdoh, Director ka Agriculture jong ka jylla Meghalaya kala ong ba ki jaka kiba la pyndonkam ha kaban rep ia u krai watla ka long kaba duna bha hynrei mynta kala nang kiew bad ka sorkar jylla ka dang treikam ha ka dur jong ka mishon ban pynthikna ba kan don ka jingpynmih thikna ia u krai ha ki snem ban wan.
Ha kane ka jingialang la pyni ruh ia ki jingbam kiba la pynmih lyngba u krai kaba la khring ia kiba bun. Ki nongsengkam lajong kila pyni nam ia u krai, ki jingbam kiba la ih ban bam noh bad ki jingbam kiba la long ban bam noh kum u Millet Malt, Cookies, Ladoos, Millet Rusk, Ragi Namkeen, Cakes, Wine bad kiwei kiwei.
Ki nongshah khot sngewbha kila dap da ka jingsngewtynnad ban iohi ia ka jinglah ban pynmih ia kijingbam kiba bun jait lyngba u krai bad kila pynpaw ia ka jingthrang ban ioh ia ki jingtip kiba bniah shaphang u krai bad ki jingbam kiba lah ban shna lyngba u krai khnang ba kin lah ban bam man la ka sngi.
Ha kane ka sngi, la sakhi ïa ka jingwanshim bynta da palat 200 ngut ki nongïoh jingmyntoi, kynthup ïa ki nongrep krai bad ki nongseng kam seng lajong na ka jylla Meghalaya, Assam & Arunachal Pradesh bad ia kane ka jingïalang la kyrshan da ka Ministry of Agriculture and Farmers Welfare, jong ka sorkar India.
