Shillong, Nailar 28 : U Myntri ka Tnad Food & Civil Supply & Consumer Affairs Bah Comingone Ymbon ha ka sngi Balang ula pyntip ba ka Sorkar Jylla kala iai kyrpad na ka por sha ka por ia ka Sorkar Pdeng ba kan nang pynrung shuh shuh ia ki nongioh marbam rashon na ka National Food Security Act (NFSA) ha Jylla khnang ban lah pynbiang marbam ia ki nongshongshnong kiba la nang kiew.
Hynrei, ka Sorkar Pdeng kala pyntip ba kano kano ka jingpynkylla ha ka jingdon ki nongioh marbam rashon, ka dei kaba hap ban ap iaka khana samari ban pynmih thymmai.
Ula pyntip ia kane haba jubab ia ka call attention motion bala wanrah da u MLA ka UDP na Mawkyrwat Bah Renikton Lyngdoh Tongkhar, uba la pynpaw ia ka jingsngewkhia halor ka jingeh bala iakynduh da ki nongshongshnong ka Domtynrong namar ka jingbym ioh mar bam rashon la bun snem.
“Wat hapdeng ka jingiai kyrpad jong ka Sorkar Jylla ban nang pynrung shuh shuh ia ki nongioh marbam rashon hapoh ka NFSA namar ka jingnang kha roi ki briew ha Jylla bad ban weng ia ki jingeh kum kaba mad da ka Shnong Domtynrong, ka Sorkar Pdeng kala ieng ha ka nongrim ba kano kano ka jingpynkylla ia ki nongioh rashon kan dei kaba hap ap haduh ka khana samari ba thymmai” ong u Bah Ymbon.
Ula ong ba wat hapdeng kine ki jingpyrshang bad ka jingpyndep lut ia baroh ki kam ba donkam, ka jingpynrung ia ka shnong Domtynrong ha ka thup ki nongioh bynta ia ka NFSA kala shah ktah namar u pud ban ai bhah marbam bala buh da ka Sorkar India.
“Ka Sorkar India kala pyntip ba ka Jylla kala dep kynjoh ia u pud bala buh jong ka NFSA kaba la pynshong nongrim na ki jingkhein jingdiah ka SECC 2011 bad kano kano ka jingpynkylla ia ka jingsam marbam rashon kan dei kaba hap ban ap haduh ka khana samari ban pynmih thymmai bad ka jingslem ban lum ia ka khana samari ba thymmai kala shah ktah namar ka khlam Covid-19” ula ong.
Naduh u 2011, ka Jylla Meghalaya kala sakhi ia ka jingkharoi ki nongshongshnong ha kaba la buh antad ba ka jingdon ki nongshongshnong ha u 2023 kala kot kumba 38.16 lak, haba ianujor bad ka 29.17 lak bala buh jingthoh da ka SECC 2011.
Kane ka jingkharoi kala lam sah ka jingkiew ka jingdawa ia ka marbam rashon hapoh ka NFSA, kaba la nang buh ha ka khim khait ban pynbiang mar rashon namar u pud bala buh da ka Sorkar Pdeng.
