Nongpoh, Nailar 28 : Ka Dorbar Shnong Umroi Madan kala pynpaw ia ka jingbynniaw kaba jur ba u dkhot jong ka Dorbar, ula iaid lait ia ka Dorbar Shnong ban pyrshah ia ka jingwan iaid lynti ka surok 4-lane Umiam-Malidor napoh ka Shnong khlem da wanrah shuwa ia ka mat sha ka Dorbar.
Une u dkhot ka Dorbar Shnong u dei u Bah CL Marsharing uba la ialam ia ka kynhun ban pynpaw ia ka jingpyr shah iaka jingthmu pyniaid ia ka surok 4-lane na ki ranab lum jong ka Shnong halor ka nongrim ba kan ktah ia ka tyllong umbam umdih jong ka Shnong.U bah Marsharing u dei u Dkhot jong ka Executive Committee ka Dorbar Shnong.
Haba iakren bad ki lad pathai khubor, u Rangbah Shnong Bah Lamborlang Makri bad Secretary Bah Banshanskhem Rynjah, kila pynshai ba kane ka surok 4-lane ban pyniaid na Shnong Umroi Madan, kan ym ktah satia ia ka tyllong umbam umdih kumba la kam da ka kynhun ba ialam u Bah Marsharing.
“Ngi la dep wan jurip kum ka Shnong ia ki jaka ba thmu pyniaid ia ka surok bad ngi la shem ba ka surok ka dang jngai bha na ki tyllong umbam umdih” kila ong.
Kila ong ba u Bah Marsharing kum u dkhot ka EC, hashuwa ba un leit ujor sha u Deputy Commissioner bad kren sha ki lad pathai khubor halor kane ka kam, ula dei shuwa ban wanrah ia kane ka mat hapoh ka Executive Committee jong kaShnong. “Kan don jingmut aiu ban shu thad ha ki lad pathai khubor” kila kynthoh.
Haba pynpaw ba ka Dorbar Shnong kam don jingtip satia ia ka jingleit jurip ki katto katne ki rangbah ka shnong sha ki jaka ba thmu shna ia ka surok, kila ong “Lait noh tang ka jingpyntip ba shen ka Ophis u DC kan sa phah ia ki Ophisar ban leit jurip, ngim don jingtip ia kiwei kiwei. Ka Dorbar Shnong ka dang ap ban ioh jintip ia ka tarik halor kane ka jingjurip”.
“Hadien kane ka jingjurip ngin sa lah ban pynthikna shispah na ka shispah ba ka surok kan ktah ne em ia ki tyllong umbam umdih. Lada ka ktah shisha, ngin hap shong pyrkhat lang bad ki bor District lem bad ka kompani ba pyntrei ia ka surok khnang ban iada ia ka tyllong um” ong kine ki Nongialam haba bynrap “Mano hi kiba kwah ban duh noh ki tyllong umbam umdih.
Ka Dorbar Shnong kala pynpaw ia ka jingkwah ba u DC un phah jurip noh kham kloi ia ka jaka. Kala kyntu ruh ia kine ki rangbah ba ujor ba kin wan shong dorbar ban tip ia kaei ka rai ne ka sienjam ba kum ka Dorbar Shnong kala iakren iathir halor kane ka kam.
