Shillong, Nailar 23 : U Lamphang ka Iingdorbar Thaw Ain, Thomas A Sangma, ha ka sngi Thohdieng ula pynpaw ba um don jingtip eiei ruh halor ka rai jong ka Congress ban sospon ia ki 2 ngut ki MLA, kiba la leit iasoh dang shen sha ka National People’s party (NPP), kaba long haduh 6 snem.
“Ngam don jingtip ia kane ka jingsospon ba 6 snem. Ngam tip phi kren ia kaei” ong u Thomas haba iakren bad ki nongthoh khubor haba jubab ia ka jingkylli ia ka rai jong ka Congress ban tynjuh ia ka hukum ba ai jingithuh ia ka jingiasoh ki laingut ki MLA ka Congress sha ka NPP halor ka nongrim ba arngut ki dei ki MLA ba shah sospon.
U Bah Gabriel Wahlang ( Nongstoin Constituency) bad Bah Charles Marngar (Mawhati Constituency) kila shah sospon haduh 6 snem hashuwa ba ma ki lem bad u Dr Celestine Lyngdoh (Umsning Constituency) kin leit iasoh sha ka NPP ha ka 19 tarik Nailar.
U Lamphang ula bynrap “Nga khlem pat ioh ia ka hukum bala sospon (bala ai da ka Congress party) tad haduh mynta. Phim lah ban khmih lynti ia nga ban shim ia ka rai haba pynshong nongrim ia kaei kaba mih ha ki kot khubor”.
Haba kylli, u Thomas ula ong ba ula ai ka jingithuh ia ka jingiasoh hadien ka jingbishar kaba bniah bha ia baroh ki ain ki kanun.
“Nga la shim ia ka rai da kaba pynshong nongrim ia baroh ki ain. Nga la bishar bad nga la shem ha ki hukum bad kumta na la shim rai ba shah ia ki ban iasoh bad ka NPP” ula ong haba bynrap “Kala paw shai ia ka jingdon ar na ka lai bynta. Ka Riti Synshar ka ong ba haba ar na ka lai bynta jong kino kino ki seng sain pyrthei ki rai ban iasoh, kane ka jingiasoh ka lah ban jia”.
, kaba long haduh 6 snem.){kind=link}