Shillong, Nailar 18: Ka North Eastern Hill University (NEHUTA) kala dawa ba dei ban weng noh mardor ia u Vice Chancellor ka skulbah NEHU Prof PS Shukla namar ki kam kiba ula leh kiba long pyrshah ia ki jaidbynriew riewlum.
Ha ka shithi sha u Dkhot jong ka National Commission for Scheduled Tribes (NCST) u Nirupam Chakma, u President ka NEHUTA Prof Lakhon Kma ula ong, “Ngi la rai ban thoh sha phi kum u dkhot ba don ka jingkitkhlieh jong ka National Commission for Scheduled Tribes (NCST) khnang ba u VC un shah bihar halor ka jingiuhroit bad pyndik ia ki riewlum bad leh ia ki kam kiba long pyrshah ia ki riewlum bad ngi dawa ba dei ban weng noh mardor ia u na ka kam.”
“Ka jingktah jong kine ki kam sniew kiba rieh jong u Prof.PS Shukla pyrshah ia ki riewlum ka long kaba sngewkhia ia ki riewlum ka Meghalaya kiba don 86.15% na ka jingdon paid ha ka jylla bad kiwei pat ki riewlum ha ka thain shatei lam mihngi jong ka ri. Ha kiba bun ki jingjia jong ka jingleh shilliang khmat ia ki riewlum kumba la kdew haneng kala long kaba palat liam bad la bteng man la ka por ban pynkheiñ ia ka hok ban ioh mar katjuh ne Right to Equality kumba la pynthikna da ka Article 14, 15 bad 16 jong ka Riti Synshar ka ri, ha kine ki 3 snem kiba la dep” ula ong.
“U dei ruh u nongpynkhein ia baroh ki rukom treikam ha ka skulbah bad ia ka NEHU Act, Statutes, Ordinances nad Regulations bad UGC Regulation 2018 naduh ba ula shimti ia ka kam kum u Vice Chancellor ka NEHU ha u snem 2021. Kumta, ka jingbteng jongu iaka kam kan pynhiar iaka NEHU bad ngi kyrpad ia phi ban shim ia ki sienjam kiba donkam ban weng noh mardor ia u na ka kam Vice Chancellor na ka bynta ka bha ka miat jong ka NEHU bad ki riewlum jong ka Meghalaya bad ka thain shatei lammihngi,” ula bynrap.
