Shillong Nailar 07: U Myntri Rangbah ka jylla u Conrad K Sangma hynne ka sngi Balang ula pyllait paidbah ia ka CM FARM+ kaba la pynwandur ban kyntiew ia ka jingrep ia ki jingthung kiba rem dor bha, da kaba pyndonkam ia ki jingmyntoi kiba wan na ka jinglong ka suinbneng ha ka jylla.
Ka jingthmu jong kane, ka long ban kyrshan ia ki nongrep da ki tiar kiba bha ha ka kam rep kam riang bad ka jingiarap pisa ban pynheh bad pyniar ia ki jaka rep bad ban kyntiew ia ka jingmih.
Haba kren ha ka prokram, u Myntri Rangbah ula ong ba ka jingthmu ba kongsan jong ka sorkar jylla ka long ban kyntiew ïa ka ïoh ka kot jong ki nongrep bad ban ai ki lad ki lynti kiba biang na ka bynta ban kyntiew ïa ka jingpynmih, ban pynthikna ïa ka dor ka mur kaba bha na ka bynta ki mar rep jong ki.
“Ha kine ki hynriew snem kiba la leit, ngi la pynlong ïa ki prokram kiba bun na ka bynta ki nongrep, ki Self Help Group (SHG), ki samla bad ki nongseng kam seng jam lajong kiba ïahap bad ka jingthmu jong ngi. Da kaba shim ba 70% ka jingbun paid jong ka Meghalaya ka shaniah ha ka rep ka riang, kumta ka long kaba donkam eh ban kyrshan ïa ka rep ka riang bad ïa ki nongrep jong ngi,” ula ong.
Ula pynpaw ruh ba ha kine ki hynriew snem ba la dep, palat 1.5 lak tylli ki longïing kila ïoh jingmyntoi na ki prokram kum ka Mission Turmeric, Ginger Mission, Floriculture Mission, Mushroom Mission bad Spice Mission. La buh ruh ia ki Processing Unit ban pynthikna ba ki mar rep jong ki nongrep kin long kiba bit dor, kiba la song bad kiba la kit sha ki bynta bapher bapher jong ka ri, kaban pynlah ia ki ban ioh ia ka dor kaba bha tam.
Ula bynrap ba ka Sorkar ka thmu ban rep haduh 10000 hectare ka jaka ha ka jinglut jingsep kaban kot T.300 klur ha ka jingsam ia ki symbai kaba kynthup ia ki jingthung kum u black pepper, vanilla, cinnamon, cashew, coffee and cocoa.
Ki jingthmu ba kongsan jong ka CM FARM+ ka long ban pynkhlain ia ka ka jylla ban pynmih ia ki mar rep kiba bha bad ban pyndonkam ia ki kor ki bor bathymmai na ka bynta ban kyntiew ia ka Good Agriculture Practices (GAP) ne ka rukom rep kaba bha bad ban pynneh pynsah ia ki jait jingthung tynrai bad ki jingthung bapher.
Haba pynpaw ïa ka jingkmen halor ka jingplie paidbah ïa ka CM FARM+, ka Myntri ka tnad ka rep ka riang ka Dr. Ampareen Lyngdoh kala ong ba CM FARM+ kadei ka sienjam kaba phaikhmat ha ka rep ka riang. Kane ka skhim kan ai jingmyntoi shibun ia ki nongrep naduh ka por ba ki bet symbai haduh ban da rah sha iew. Kala pynpaw ruh ba ka Umdohkha ha Ri Bhoi District mynta ka la long ka jaka pynmih symbai, ha kaba la pynheh ïa ki symbai da ki kynhun nongrep-kila nang pynmih bun shuh shuh ïa kine ki symbai kiba la long ka jingïohnong. Ka Ri Bhoi ka dei ka shang bam jongka jylla Meghalaya bad ka CM FARM+ kan pynthikna ba ki nongrep ki ioh ia ki jinghikai kiba donkam.
Katba u MLA ka Nongpoh, u Bah Mayralborn Syiem, ula pynpaw ba ka CM FARM+ ka dei ka sienjam kaba kongsan ha kaba kyrshan ïa ki nongrep, da kaba tei lyngba ki jingpyrshang kiba dang ïaid shakhmat jong ka sorkar ban kyntiew ïa ki bynta kiba kongsan kynthup ïa ka rep ka riang. Ula ong ruh ba ka sorkar ka ka iengskhem ban iarap ia ki nongrep, da kaba wanrah ia ki lad ki lynti ban peit ia ki jingeh ki jingdonkam jong ki kiba nang mih man la ka por bad ban pynroi ia ka rep ka riang.
Ki nongrep kila ïoh ruh ïa u symbai Large Cardamom bad Black Pepper lyngba ka Spice Development Scheme.
 ne ka rukom rep kaba bha bad ban pynneh pynsah ia ki jait jingthung tynrai bad ki jingthung bapher.){kind=link}