Shillong, Nailar 07 : Ka jingkyrmen jong ka India ban ioh takma ksiar ha ka Paris Olympics na ka Vinesh Phogat, kala dum ngit hadien ba kane ka thei ialympat ka India, kala shah pynduh noh (disqualified) ban iakhun ia ka phainal ialympat ki thei ba khia 50 kg namar ka jingshem ba ka khia tam sa 100 gram na u pud bala buh hynne ka step sngi Balang.
Watla ka Vinesh bad ka kynhun, kila pyrshang katba lah ban sangeh bam jingbam ne dih um baroh shimiet ban khate ia ka jingkhia kynthup ka jingkhap ia u sniuh bad kiwei kiwei, hynrei kine ki jingpyrshang ki khlem seisoh satia.
La pyntip ba ka Vinesh kala khia haduh 52 kilo hadien ka semi phainal kaba long ha ka miet sngi Balang. Kala pynut ia ka miet ban khate katba lah ia ka jingkhia hynrei kala lah ban pynduna sha ka 50.1 kilo. Ha ka por ba thew ia ka jingkhia shuwa ban pynlong ia ka jingiakhun, ki bor pyniaid kila pynbna ba ka Vinesh kala shah weng noh namar ka jingkhia.
Kane ka jingshah pynkut ia ka jingiakhun, ka mut ba kam shym la ioh shuh ban iakhun ia ka phainal pyrshah ia ka thei ialympat ka USA ka Sarah Hildebrandt.
Ka Indian Olympic Association )IOA kala pyllait ia ka kyrwoh ba pynpaw ia ka jingsngewsih kaba jur halor ka jingshah pyn kut noh ka Vinesh ban iashimbynta ha ka lympung.
U Myntri Rangbah Duh ka Ri, Narendra Modi ula thoh ha X ban pynpaw ia ka jingkyrshan ia ka Vinesh da kaba ong “Vinesh, phi dei ka Champion hapdeng ki champion! Phi dei ka jingsarong ka India bad ka jingai mynsiem ia iwei pa iwei na ki nong India. Kaei kaba jia mynta ka sngi kala pynmong shisha. Nga kyrmen ba lehse ki kyntien ki lah ban pynpaw ia kaei ka jingsngewsih kaba nga don mynta. Ha kajuh ka por, Nga tip ba phi dei ka riew ialeh. Ka dei ka jinglong jong phi ban iakhun ia ki jingtynjuh baroh. Wanphai biang da ka jingkhlain ! Ngi kyrshan lut ia phi”.
U Myntri kam Pohiing Amit Shah ruh ula thoh ba laei kaba jia ia ka Vinesh Phogat ha ka Olympics kala pyndkut ia ka jing kyrmen jong ki million ki nong India. Ka don ia ka sap ialehkai kaba kynsai bha, kaba tyngshain bad ka nam ban pynliem ia ki World Champion.
Ka Vinesh ka dei ban iakhun ia ka phainal pyrshah ia ka Sarah Hildebrandt jong ka USA, kaba ioh khur ia ka takma rupa ha ka Tokyo 2020, ban ioh ia ka takma ksiar. Ia ka Vinesh la pynmih bujli noh da ka Yuznelis Guzman jong ka Cuba, ka ban iakhun ia ka phainal ha Champ-de-Mars Arena.
IOA kala pyllait ia ka kyrwoh ba pynpaw ia ka jingsngewsih kaba jur halor ka jingshah pyn kut noh ka Vinesh ban iashimbynta ha ka lympung.){kind=link}