Long kiba la khreh ban tur paidbah sha ki jaka ba wan rung ki poiwir
Shillong, Nailar 06 : Ka Khasi Students’ Union (KSU) kala bthah ia baroh ki shnat treikam naduh ki District, ki Circle bad ki Unit ba kin peit pyrman bha baroh 24 kynta shisngi ha baroh shitaiew lynter, ha ki jaka khappud ka Bangladesh ban nym ailad ia ka jingwan rung tuh ki nong Bangladesh kiba phetwir na ka thma pohiing ha katei ka Ri ba markhap.
Ka KSU lyngba ka Information & Publicity Cell kala pynmih ia kane ka jingbthah halor ka jingiohi ia ka jingkynad kaba jur ha Ri Bangladesh bad ka jingpra phom jong ka Sorkar, kaba pynlong wat ia ka Myntri Rangbah Duh ka Ri ka Sheikh Hasina ban wan phet sha India.
Kat kum ki jingbthah, ka KSU kala ong “Peit pyrman naduh step haduh miet ia ki briew mynder kiba wan rung sha Ri Khasi la ka dei na khappud Bangla ne Assam”.
“ Wat la ka sorkar jylla ka la pynbna korphiw ha khappud naduh 6 baje janmiet haduh 6 baje mynstep, hynrei ha kine ki por, ki poiwir ki lah ban rung lyngba ki dalal”.
“Ia syllok bad ki bor shnong ban khanglad ia ki briew ba nabar ba wan sah ha la ki shnong”. Ka KSU kala bthah ruh ba lada ki (nong Bangladesh) wan tur paidbah na kano kano ka thain Khappud, baroh ki dkhot kin hap khreh ban tur lang sha kata ka jaka.
Ka jingbthah bala phah sha baroh ki shnat treikam ka KSU ka ong “ Ka Khasi Students’ Union (KSU) ka la iohi ia ki jinglong jingman ha ka ri Bangladesh ha kaba ka synshar ka khadar ka pra phom bad ka ri ka la poi sha ka jingiakynad bym ithuh ithaw shuh. Ki para dkhot baroh ki la tip lut ba wat ka sorkar ka khyllem bad kane ka la wanrah biang ia ki jingsyier kumba jia ha u snem 1971”.
“Ha u snem 1971, ka jingiakynad ha Bangladesh, ka la pynlong ia ki nongshong shnong kane ka ri ban phetwir na la ka ri bad tur ruma kat sha ba lap. Ha kane ka jingjia mynshwa da ki lak ngut ki wan poiwir sha ki lum Khasi bad ioh jingiarap na ka sorkar ban seng shnong bad iing hapdeng jong ngi khlem ka jingbit ki paid Khasi. Kane ka jingwan ki khar bangla, ka pynshong syier ia ki rit paid Khasi ha la ka Bri U Hynñiewtrep naduh u snem 1971 haduh mynta kaba poi sha ki jingiakynad, ki jingmynsaw bad jingpyniap na ka por sha ka por namar kine ki khar bangla ki kwah ban pynkylla ri bengali ia ka Ri Khasi” kala ong.
Kala ong ruh “Balei ka KSU ka hap ban ia khih? Balei ki paid Khasi ki shah kem shah pyniap shah knieh ka khaii shah knieh ka khyndew ka shyiap? Ka daw ka dei namar kine ki poiwir ba wan naduh u snem 1971”.
“Mynta ka thma ha Bangladesh ka la khie biang. Ki paid Bangladesh hapdeng ka thma pohiing kin ia kulmar para ma ki bad kane ka wanrah ia ka jingphet wir ia ki phew lak ngut ki jait jong ki. Nuksa wat ka PM ka Bangladesh ka la wan phet sha India. Kan eh aiu ba ki paidbah ka Bangladesh ban wan phet sha Meghalaya” kala bynrap.
Ka KSU kala ong ba ka Jaidbynriew kam shym poi pyrkhat ba kaei kaba jia ha u 1971 kan pynjaw snam, pyniap briew haduh katne katne ha la ka Ri Khasi. “Kumta to phikir ba ha u snem 2024, ka KSU kan long kata ka nongpeit pyrman (sentinel) ha man la ki shnong ki thaw khamtam ha khappud ba ki poiwir na Bangladesh kim dei ban buhai shnong biang sa shisien ha ki lum baieid jong ngi namar lada ki wan biang, ngin sa kylla rit paid thikna kum ka Tripura” kala ong.
“Ngim pat lah ban teh lakam ia ka jingrung kyrthep ha u 1971, kumta ym long ban pynkhia shuh shuh ia ka lyngkor ia ki pateng da kaba ailad ha u 2024” kala bynrap.
