Shillong, Nailar 06 : U Nongaiktien ka NPP bad MLA barim ka Mawsynram Bah Himalaya M Shangpliang ha ka sngi Ba-ar, ula kyntu ia ki nongshongshong ha khappud ba kin long kiba peit pyrman bha namar ka jinglong jingman ka suk ka sain ha Bangladesh kaba don mynta hapdeng ka jingiaumsnam.
Haba iakren bad ki nongthoh khubor, u Bah Himalaya ula ong ba ki jingjia ba dang shen ha Bangladesh kala wanrah ia shi bun ki jingkhuslai na ka bynta ki paidbah ba sah ha ki shnong khappud, khamtam ha Mawsynram constituency, kaba ka khappud ka long kaba laitlan bha.
“Ka jingkyrpad jong nga ia baroh kiba sah ha khappud khamtam ki Dorbar Shnong ba kin long kiba peitngor bha bad ban peit bha ia ki riew thymmai kiba wan sha shnong namar kane ka dei ka por kaban jur ka jingwan rung ki briew kiba shah beh na Bangladesh bad kine ki briew kila pyrshang ban prong shapoh u pud u sam jong ngi” ula ong.
“Nga hap ban iaroh ia u Symbud Myntri Rangbah ka Jylla, uba bat ia ka tnad Pohiing, uba la bthah ban pynjari ia ka korphiw ha shilynter ki jaka khappud khnang ban khanglad ia ki briew ba kin wan rung ne mih ha khappud” ong u Bah Shangpliang haba bynrap “Ki don ki khubor hamsaia ba ki briew ki kwah ban wan jam sha shiliang hynrei ki BSF bad ki shipai ka Ri India kila peit pyrmen bha bad ngi ngeit ba kan nym don satia kano kano ka jingjia ka bym sngewtynnad ha ki jaka khappud”.
U Bah Shangpliang ula ong ba ki kam iaumsnam ha Bangladesh kila ktah jur bha ia ka kamai ka kajih jong ki nongshong shnong ha khappud, kaba long na baroh arliang.
“Nga kwah ban ong ba lehse kane ka kam umsnam ha Bangladesh kan nang jai jai noh kham kloi khnang ba ki briew jong ngi kin lah ban bteng biang ia ka khaii ka pateng ha khappud. Ngi don ia ki Iew Khappud ba kongsan bha ha Balat kaba ka jingiadei iathied ka kot da ki lak tyngka manla u snem, manla ka taiew. Kumta, ka jinglah tehlakam noh kham kloi kan bha shaba palat” ula bynrap.
