Shillong, Nailar 03: Ka Indian Oil Durand Cup kaba 133 mynta kan don noh ar tylli ki kynhun na Meghalaya, kiban iashim bynta ha ka Group F, ha kaba ki jingiakhun kin long lang hapoh ka Nongbah Shillong.
Ka Hyderabad FC, kawei na ki kynhun ba don ha kane ka Group, kala iehnoh noh ia kane ka jingialehkai namar ki daw ki bym lah kiar.
Watla ki don bun tylli ki Club kiba lah ban mih bujli ia ka jaka jong ka Hyderabad FC hynrei ka Sorkar Meghalaya kala ai jingmut ban pynrung noh da ka Rangdajied United FC (RUFC), bad ïa katei la pdiang sngewbha da ka Durand Cup Organising Committee.
Ka Sorkar Meghalaya kala don bynta ha ka ban kyntiew ïa ki sap ïalehkai ha ka Jylla bad kala kyrshan ruh ïa ka rai ban pynrung ïa ka RUFC. Ki kynhun ïalehkai football jong ka jylla Meghalaya kila sngewkmen ban ïohi shuh shuh ïa ki nongïalehkai football jong ka jylla ban ïakhun pyrshah ïa ki kynhun ïalehkai kiba heh ha ka ri.
Ka jingiakhun kaba nyngkong jong ka Rangdajied United FC kan long pyrshah ia ka FC Goa ha ka Lah sngi u Blei, ka 5 tarik Nailar 2024 ha ka por 7 baje janmiet. Ka jingdie ia ki tiket yn sa pyllait noh shen bad yn sa die ha Box Office hajan Golf Links ha ka sngi ba don ka jingialehkai.
U Myntri uba khmih ia ka kam ialehkai u Bah Shakliar Warjri, ula pynpaw iaka sngewkmen ban ïohi ïa kane ka jingpynrung.
“Ka long ka jingsarong kaba khraw ïa ka Meghalaya ban don artylli ki kynhun trai ri kiban ïakhun ha ka Durand Cup. Kane kadei ka sien kaba nyngkong ba la pynlong ïa kane ka jingïalehkai ha Shillong bad ka Rangdajied United FC kaba ïalehkai ha kajuh ka Group bad ka Shillong Lajong FC ka ai ïa ka lad ban pyni ia ka sap ïalehkai football kaba ka Meghalaya ka don” ong u Bah Warjri.
Ka Durand Cup ka dei ka lympung kaba ai ai ka rynsan bad ka lad ïa ki khlur ialehkai Football kiba thymmai bad la khmih lynti ba ki don ki khlur ba pawnam kin mih na ka Meghalaya lyngba kitei ki jingïalehkai.
