Shillong, Nailar 02 : Ka Durand Cup ba 133rd ha Shillong (Shillong leg), kala sdang hynne ka janmiet da ka jingplie paidbah ia ka da u Myntri Rangbah ka Jylla Conrad K Sangma hapdeng ka jingialang plie kaba iphuh iphieng bha.
Ia kane ka lympung ialehkai la pynlong ha ka Jawaharlal Nehru Stadium ba dang shu dep shna pynbna bad la ot ribbon ia ka da ka jingialehkai hapdeng ka kynhun ialehkai ka Jylla ka Shillong Lajong FC pyrshah ia ka Tribhuvan Army Football Tem ba na Nepal.
Kane ka dei ka sien ba nyngkong eh ba kane ka lympung ialehkai phutbol bala rim duh ha dewbah Asia, kan long ha kane ka Nongbah jong ka Jylla Meghalaya. La pynshongkun lang ia kane ka sngi da u Air Marshall SP Dharkar PVSM, AVSM, u Air Officer Commanding in Chief, Eastern Air Command bad Lt General Ram Chander Tiwari, UYSM, AVSM, SM, GOC-in-Chief, Eastern Command.
Kila don shibun ki jingialehkai ba bun jait na ki kynhun bapher bapher wat hapdeng ka jinghap u slap hynrei namar ka jinghap slap, ki shipai kim shym la pynlong shuh ia ka jingppyninam ha ka jingpynher liengsuin. Tangba, la iohi pat ia ka Bhangra bad Gatka bala iashimbynta da ki shipai Sikh Regiment bad la pynbud da ka Daredevil Motorcycle show jong ki shipai ka Military Policy nalor ki jingrwai choir jong ki khynnah bad kiwei kiwei.
U Myntri Rangbah ula iakynduh ruh ia ki rang ialehkai hashuwa ba kin iashut reng ha madan, kaba dei ruh ka dak ka jingplie ia ka jingiakhun jong ka Group F-kaba baroh 6 tylli ki jingiakhun kin long ha Shillong.
Ka Shillong kan ioh pynlong ia baroh ki jingialehkai jong ka Group F ba kynthup ia ki kynhun ialehkai ISL ba kynthup ia ka FC Goa bad Hyderabad nalor ka Shillong Lajong FC bad ka Tribhuvan Army Footbal Team na Nepal.
Baroh ki jingiakhun jong ka Durand Cup la pyni live ha ka Sony Sports Network bad lah ruh ban peit ia ka live stream ha ka SonyLiv OTT platform.
Kaei ka Durand Cup
Ka Durand Cup ka dei ka lympung ialehkai phutbol bala rim duh ha dewbah Asia bad kaba wan ba lai na ki lympung kiba rim duh ha ka pyrthei. Ia kane ka lympung la pynlong da ki shipai Indian Army.
Kane ka lympung kala sdang nyngkong eh ha Shimla ha u snem 1888 bad nangne kala poi sha New Delhi ha u snem 1940, kaba la pynlong haduh u snem 2016. Ha u 2019, kane ka lympung kala hap hapoh ka jingkhmih jong ka Eastern Command bad kala wna poi sha ki thain Mihsngi jong ka Ri ha kaba la jied ia ka Kolkata kum ka ktem.
Kaei kaba pynlong ia ka Durand Cup kaba pher duh ka long ba ki nongjop ki ioh ia lai tylli ki trophy, artylli ki rotating (Durand Cup bad Shimla Trophy) bad kawei kaba ki ioh ban buh shirta (President Cup).
, kala sdang hynne ka janmiet da ka jingplie paidbah ia ka da u Myntri Rangbah ka Jylla Conrad K Sangma hapdeng ka jingialang plie kaba iphuh iphieng bha.){kind=link}