Nongpoh, Naitung 31 : Ka Khasi Students’ Union (KSU)-Nongpoh Circle, hynne ka sngi kala kyndang ban beh krad ia bun ngut ki nongbylla bar jylla kiba wan trei bylla be-ain ha ka thain Ri-Bhoi khlem da pynbiang ia ki kot ki sla kat kum ka Inter State Migrant and Workmen Act, 1979.
Ka KSU hapoh ka jingialam u President ka Circle samla John Lyngdoh, kila hiar khynra Work Permit ha ka jaka ba pyntrei ia ka Polytechnic kaba don ha ka shnong Nongkhrah, Ri-Bhoi District hadien ka jingtip ia ka jingdon bun ki nongbylla bar jylla ba pyntrei ia ka jingtei.
Ha kane ka jingkhynra, ka KSU kala shem ba don haduh 15 ngut ki bar jylla ki bym don satia ia ki kot ki sla ba biang ym tang ka work permit hynrei wat ka EPIC, ka Police Verification bad kiwei kiwei ki kot ki sla ba donkam ban pynshisha ba ki dei ki nong India.
Dang shen, ka KSU North Khasi Hills ha ka 6 tarik Naitung, kala pynieng ia ka khyrdop ILP ha 20 Mer, Ri-Bhoi ban tehlakam ia ka jingrung kyrthep ki bar jylla bad ha kane ka sngi, da ki spah ngut ki bar jylla kila shah bat bad shah pynphai sha Assam.
Haba kren sha ki lad pathai khubor, u samla John Lyngdoh ula ong ba kane ka jingkhynra Work Permit ka dei kaba la pynlong da ka seng ha kylleng ka Jylla ban pynbor ia ka Sorkar ba kan pyntreikam noh ia ka MRSSA Act 2016 bad ia ka ILP.
