Shillong, Naitung 26: U Myntri Rangbah ka Jylla u Conrad K. Sangma hynne ka sngi Thohdieng, ula ong ba ka sorkar jylla ka ialeh ban pyndap ia ka jingduna hapdeng ka jingdawa bad ka jingpynbiang ia ki nongtrei na ka bynta ki kam shabar ri da kaba pynrungkam ia ki samla bad ki tnad kiba lah ban shaniah.
“Kum ka sorkar, ngi la tuklar ban pyniasoh ia ki samla jong ngi bad ki Agency. Ngin sa bei tyngka ia ka jingai jinghikai jong ki kaba T. 50,000, kyrshan ïa ki ha ka jingïaid lynti ba kin ïoh kam shabar ri bad ban pynsuk ïa ki Visa bad kiwei kiwei ki kot ki sla kiba donkam,” ong u Myntri Rangbah haba ai jingkren sha ki samla ha ka Job Fair banioh leit trei shabar ri kaba la long ha ka District Auditorium Tura, West Garo Hills.
U Conrad ula ong, ka sorkar kala shim ia ka rai ban kyrshan ha ka jingpynrung kam shabar ri namar ba ka don ka lad kaba khraw ha ki ri kiba la bun ki briew kiba la noh ha ka rta. “Lada ngi lah ban phah 1,000 ngut ki samla sha ki ri kum ka Japan, Singapore bad UK, kin kamai kumba T. 1.2 lak shibnai bad kan sa lah ban kynshew ïa ka pisa bad ha kajuh ka por kan ïarap shibun ïa ka jingïoh pisa bar ri iaka jylla jong ngi,” ula ong.
“Ka jingbun briew jong kiba bun ki ri kiba la kiew kala nang kiew haka jingdon ki tymmen briew bad kim don ïa ki samla kiba biang kiba lah ban trei ia ka kam. Haba ka ri India ka don ia ka jingbun briew kiba dei da ki samla ha ka pyrthei bad kiba kham samla tam ha ka jylla Meghalaya, ka don ka lad ban weng ia kane ka jingduna, da kaba phah ia ki samla kiba la pynkhreh bad pyntbit ban ioh kam ban trei ha kitei ki ri hadien ba kila ioh ia ka jinghikai bad jingkyrshan ha kaba iadei bad ki kot ki sla na ka Sorkar.” u la bynrap.
Haba ïakren shaphang ka jingwan jongu sha ri Japan, u Myntri Rangbah ula ong, “Arngut ki nurse na Meghalaya kiba la shah buh ha Kobe, Japan ki dapda kajingkmen ban ioh ia ka lad ban trei ha katei ka ri. Nga la iakynduh shimet ia ki ha Kobe bad nga la iakynduh ruh ia ki nongpyniaid jong ka Hospital. Ka kynhun hospital ka donkam 700 ngut ki Nurse man la u snem. Ki donkam ïa ka bor trei jong ki samla namar ba ka ri jong ki ka mad ia ka jingeh na ka jingduna ki samla kiban trei ha ki kam bapher.”
“Ka don ka jingdawa kaba khraw ym tang ïa ki Nurse ha ka liang ka koit ka khiah bad kumjuh ha kiwei pat ki liang, kum ka jingpynpoi marbam, ha kad liengsuiñ, ka kam pdiang sngewbha, ka rwai ka siaw bad kiwei kiwei,” ong u Myntri Rangbah bad ka pynpaw ba ki samla jong ka jylla jong ngi ki lah ban shimkabu ia katei ka lad.
Ha ki khyndiat bnai ban wan, 27 ngut ki samla na kane ka jylla yn buh ha ri Japan, 44 ngut ha Singapore, bad 50 ngut ha UK kyrmen ha ka kam ai jingsumar.
Haba pynpaw ia ka jingsngewkhia halor ka jingsheptieng bad ka jingbym jingshaniah, u Myntri Rangbah ula ong ba ka Meghalaya Skill Development Society (MSSDS) bad ka tnad Labour, Employment & Skill Development Society kila shah pynkhamti ia ka kam ban wad ia ki Agency kiba biang na ka bynta ki jingai jinghikai, jinghikai halor ka ktien ka thylliej ryngkat bad ka pynioh kam.
“Ki samla jong ngi, ki lah ban shaniah ha kine ki Agency kumba ngi la dep ban ithuh ia kiba bha tam, kumta ym dei ban don jingtieng eiei. Ngi buh hakhmat eh ïa ka jingshngaiñ jong ki nongshong shnong jong ngi bad ngin pynthikna ba kin ïoh ïa ka kamai kajih kaba don jingmut,” ula pynkut.
