Kathmandu, Naitung 24 : Haduh 18 ngut ki briew kila iap hadien ba liengsuin Saurya Airlines kala hap katba ka dang thmu ban her noh napoh ka kad Tribhuvan International Airport ha Kathmandu, Nepal hynne ka step sngi Balang.
Kat kum ka khubor, 19 ngut ki briew kynthup ki nongtrei ka liengsuin, kila don ha kane ka liengsuin kaba thmu ban leit sha Pokhara, ka Sor ba wan ba-ar ha ka jingheh ha Nepal, kaba dei ruh ka jaka jngohkai ba khring bha ia ki nongshangkai, kala poi sha kane ka jingjia hynne ka step por 11 baje eiei.
Ki pulit ka Kathmandu ki pyntip ba tang u Pilot ula lait im na kane ka jingjia bad la pynkit noh ia u sha Hospital.
Ki Pulit bad ki kali pynlip ding kila dang iakhun ia ka ding bad ban sei ia ki met jong ki briew ha kane ka jaka ba hap ka liengsuin. La pyntip ba ki Pulit kila ioh ban sei ia baroh 18 ngut ki briew.
Ka Nepal kala sakhi ia ka jinghap ki liengsuin kaba long beit kawei manla u snem. Naduh u 2010, kane ka Ri kala sakhi ia ka jinghap haduh 12 tylli ki liengsuin kynthup ia kane kaba mynta.
