Guwahati, Naitung 21 : Namar ka jingbym shongsuk shuh hapoh ka Ri, ka Iingkashari Supreme Court ha ka sngi U Blei, kala pynduna noh ia ka bhah thungkam Sorkar. Kane ka rai kala mih hadien ba ki nongiakhih kila pynibor ia ki Pulit bad ki bor Sorkar, kaba lam sha ka jingiap ki 100 ngut ki briew.
Kane ka Iingkashari ba hakhlieh duh ha ka hukum, kala bthah ba 93 percent na ki kam Sorkar dei ban ai kat kum ka jingwan shakhmat bad ieh ia 7% sha ki bahaiing jong ki shipai, kiba iakhun ia ka thma Laitluid ka Bangladesh ha u snem 1971 bad kiwei kiwei ki kyrdan.
Shuwa kane, ka Iingkashari kala bhah haduh 30% ka jingthungkam sha ki bahaiing ki shipai ba iakhun thma Laitluid, kaba lam sha ka jingiakhih halor ka nongrim ba ka jingthungkam ka dei ban long kat kum ka jingwan shakhmat.
Kane ka jingiakhih ha baroh kawei ka Ri kala pynbor ia ka Sorkar ka Sheikh Hasina ban pynjari da ka korphiw ha baroh kawei ka Ri khnang ban tehlakam ia ki nongiakhih namar ki Sorkar kim shym la lah shuh ban leh eiei. Kala khang ruh ia ka Internet ha baroh kawei ka Ri bad khot ia ki shipai ba kin iarap ia ki bor District ban tehlakam ia ka jinglong jingman.
Haba kren sha ki lad pathai khubor, u Myntri kam Pohiing ka Bangladesh Asaduzzaman Khan ula ong ba ia ka korphiw un sa pynjynsur hapdeng 3 baje janmiet haduh 5 baje janmiet mynta ka sngi U Blei khnang ba ki paidbah kin ioh leit siew leit tada. Ka Sorkar kala pynbna ruh ia ka 21 bad 22 tarik Naitung kum ka sngi Shuti lait noh tang ki Emergency Service.
Ki Nongiakhih kila iasaid ba kane ka jingsam bhah ka dei kaba ktah mationg bha bad kaba pynmyntoi tang ia ki nongkyrshan ka Hasina, namar dei ka Awami League Party kaba ialam ia ka jingiakhih laitluid.
Ka Hasina kala pynksan ia kane ka jingsam bha bad ong ba ki shipai bala shongthait ki dei ban ioh ia ka burom kaba khraw duh namar ka synniang jong ki ha ka thma pyrshah ia ka Pakistan, kam pher ki dei kiba don bad kino kino ki party ruh.
Ka Liang Pyrshah Bangladesh Nationlist Party kala kyrshan ia kane ka jingiakhih bad rai ruh ban pynlong iala ka jong ka jingiakhih.
Namar kane ka huri hura ha Bangladesh, palat 1000 ngut ki samla pule ka India, kila wan phai noh sha India na Bangladesh lyngba ki Land Transit Point bapher bapher lane da ka liengsuin.
U Myntri korbar kam bar ri S Jaishankar ula ong ba ka Foreign Ministry ka la pynleit jingmut pura sha ka jingshngain bad ka bha ka miat ki nong India ha Bangladesh.
