Shillong, Naitung 18 : U Myntri Rangbah ka Jylla Conrad K Sangma, ula pyllait paidbah ia ka Durand Cup Trophy jong ka Durand Cup 2024 ha U Soso Tham Auditorium hynne ka sngi Palei.
Kane kan dei ka sien pynlong ba 133 jong ka Durand Cup bad yn pynlong ha ka sien ba nyngkong eh ha nongbah Shillong.
Haba kren ha ka jingialang, u Myntri Rangbah ula pynpaw ia ka jingkmen ba ka Jylla kala ioh ban pynlong ia kane ka lympung kaba paw nam mynta u snem, watla kala thrang bha ban ioh pynlong ia ka Durand Cup ha u snem bala lah.
“Nga da kmen shisha bad sngew burom ba ka Meghalaya kala don bynta lang bad kane ka lympung ialehkai phutbol barim duh ha Asia bad ka ba 5 na ki lympung ialehkai jong ki Ri ha ka pyrthei” ula ong haba pyntip ba ka Sorkar kan ai ia baroh ki jingkyrshan ban lah pynlong ia kane ka lympung kaba jop.
U Conrad ula ong ruh ba ka kam ialehkai ka dei kaba hapdeng eh jong ki policy bad ki prokram ka Sorkar. “Ka Sorkar kala pynleit jingmut bha ban iarap ia ki kynhun bapher bapher ha ka jaka ban shu kit ka ai skhim ban kyntiew ia ka kam ialehkai hapoh ka Jylla”.
U Myntri Rangbah u pyntip ba ka Sorkar kala kynshew bha ha ki samla bad ki jingkyrshan ba donkam ha ki kam alehkai ha kine ki khyndiat snem bala leit noh. “Ha kine ki hynriew snem, ngi lah mang kumba T.1000 klur ban kynshew ha ki madan ialehkai” ula ong bad bynrap “Ki jingkyrshan ba ngi ai sha ki Sport Association bapher bapher, ki Seng bad ki lympung ialehkai ruh ki dei kiba kongsan”.
Ula pynkut da kaba kyntu ia ki nongshongshnong ba kin long shibynta jong ka Durand Cup 2024 kaba dei ka lynti ban pyni ia ka jingialong kawei ha ka Ri bad kaba pyni ia ka jingburom ia ki bor shipai.
Ka jingialehkai plie kan long ha JN Stadium hapdeng ka Shillong Lajong bad ka Tribhuvan Army Football Club ha ka 2 tarik Nailar ha ka por 4 baje janmiet.
Ha kane ka jingialang plie, kan don ruh ka jingpyni paidbah ia ki jingpynher liengsuin ki shipai Air Force, ki jingshad bad ka put ka tem.
Hadien kane ka jingialang, u Myntri Rangbah ula khaweh ia ka lama jong ka Durand Cup 2024 Trophy Roadshow.
