Shillong, Naitung 17 : U Myntri Rangbah ka jylla u Conrad K. Sangma, ula leit sha Rashtrapati Bhavan ha ryngkat ki nongrep bad ki nongseng kam jong ka jylla, kiba la iashim bynta ha ka tamasa sohtrun ne Meghalaya Pineapple Festival, 2024, kaba la pynlong ha Dilli Haat, New Delhi.
Ka jingleit jngoh kala pynskhem biang ia ka jingkular jong ka Sorkar Jylla ban pynneh pynsah bad kyntiew ia ka jingmyntoi jong u budlum ka jylla ha ka ka ioh ka kot jong ka jylla, kata ki nongrep.
Ka kynhun ba la ialam da u myntri rangbah ryngkat bad ki 19 ngut ki nongrep bad 10 ngut ki nongseng kam jong ka jylla Meghalaya, ka kynthup ruh ia u Bah CVD Diengdoh, Secretary ka tnad planning ka sorkar jylla, I Majaw Joint secretary ka tnad Bording, Bah Alexander Mukhim, Deputy Secretary, Kong Anita Kharpor, Joint Secretary bad ka Kong I Diengdoh, Joint Mission Director, ka SRES.
Da ki jingïarap ha ka rukom pyniaid ia ka mishon ha ki shnong ki thaw, ki polisi jong ka Sorkar Meghalaya kila ai jingmyntoi ia ki nongrep bad ki nongseng kam jong ka jylla ha ki kyrdan bapher bapher.
Hadien ba la pynlong ia ka 2nd Meghalaya Pineapple Festival 2024, kane ka jingleit jngoh ia ka Rashtrapati Bhawan ryngkat ki nongrep bad ki nongsengkam ka pyni iaka jingthmu jong u Myntri Rangbah ban pynkupbor ia ka ryndang jong ka ioh ka kot, ki nongrep, bad ki nongseng kam jong ka jylla Meghalaya.
U Myntri Rangbah ka Jylla u la ong, “Ka Sorkar Meghalaya ka ju ïatreilang beit bad ki nongrep, kiba long u budlum jong ka ïoh ka kot jong ka jylla. Kane ka jingjia, hadien ka ka jingjop jong ka tamasa sohtrun 2024, ym tang ba ka ithuh ia ka jingtrei shitom jong ki hynrei ka pynshlur ruh iaki ban kiew sha ki kyrdan kiba hajrong”.
Ha kane ka jingleit jngoh, u Myntri Rangbah ula kren ruh shaphang ka jingïatylli jong ka jaidbynriew, kaba pyni ba ka jingdon jong ki nongrep Meghalaya ha ka Rashtrapati Bhawan kadei ka mat jong ka jingsarong, kaba pyni ia ka jingiatylli jong ka jaitbynriew.
Ki nongrep jong ka jylla ki la leit jngoh ruh ia ka ‘Janjatiya Darpan’, ka art bad ka kolshor jong ki riewlum ha ka Rashtrapati Bhawan, kaba la plie da ka President ka ri India ka Droupadi Murmu, kaba ma ka hi kadei na ka jaidbynriew riewlum. Ki nongwan jngohkai kila sngewkmen ban iohi ia ki jingshna mawkordor bad ki jingdeng ryndang jongki Khasi bad Garo jong ka Meghalaya kiba la pyni ha katei ka jaka. Kala don ka jinglum jingtip kaba pura ia kine ki tiar, ryngkat bad kiwei pat ki jingthoh shaphang ki jaitbynriew bapher ha ka ri India.
Ki nongrep, kiba leit jngoh ia ka Rashtrapati Bhavan ryngkat bad u Myntri Rangbah kila sngewtynnad bha.
“Ka tamasa sohtrun ka Meghalaya kala plie lad thymmai na ka bynta jong ngi bad ka jingleit jngoh ia ka Rashtrapati Bhawan ka long ka jingphohsniew kaba la urlong”.
U myntri rangbah ula ju kyrshan man ala ka por ia ki nongrep. Dei na ka jingpyrshang jong ka sorkar ba ki sohtrun jong ngi mynta la shalan shabar ri bad bam ia ki ha kylleng ka pyrthei,” la ong ka kong Badashisha Lapang, ka nongrep naka jylla.
Uwei pat u nongrep ula ong, “Kane ka jingjia kala long kum ka jingpynshlur ia ki bad da ka jingsynran lang jong u Myntri Rangbah ka Jylla sha ka Rashtrapati Bhawan, kala pyni ba ia ka jingtrei shitom jong ngi baroh la khein kor bad ithuh ha ka kyrdan kaba ha khlieh duh.”
U Bah Cyril V. D. Diengdoh, ula pynpaw ia ka jingaiti ka sorkar jylla ha ka jingroi ka rep ka riang. U la kdew ba “Ka jingleit jngoh ka long ka jingkdew jong ka jingkular jong ka sorkar ban pynshlur ia ki nongrep ban wad shuh shuh ia ki lad ki lynti na ka bynta ka jingroi bad jingpyniar shuh shuh ia ka.”
Ka jingpyrshang jong ka Sorkar ban kyntiew ia ki sohtrun ryngkat bad kiwei kiwei ki mar rep jong ka jylla kala pynlong ia ka jingshalan kaba jop shabar ri bad ia ki mar rep bapher bapher sha ki bynta bapher bapher jong ka pyrthei. Dang shen, ka jylla ka la shalan palat 3.5 Ton ki sohtrun sha Middle East, ka jingjop jong ki jingïarap ha ka rukom treikam da ka Sorkar.
Kine ki jingïarap ki treikam lang bad ki jingthmu kum ka PRIME Meghalaya, kaba thmu ban pynkhlain ia ka jinglong jingman jong ki nongseng kam sengjam ha ka jylla.
Ki nongseng kam sengjam ruh kila pynpaw ia ki jingsngew ki jongki “U Myntri Rangbah uba la synran ia ngi ha ka jingleit jngoh ia ka Rashtrapati Bhavan, la pynskhem biang ia ngi ba ka jingkyrshan na ka sorkar jong ngi kan iai don beit. Ka pynshlur ia ngi ban wanrah ia ki jingpynwandur bad pynheh ïa ki kam jong ngi,” ong ka Kong Robina J Sangma, ka nongseng kam sengjam na ka PRIME (Promotion and Incubation of Market Driven Enterprises), Meghalaya.
Ka jingleit jngoh ia ka Rashtrapati Bhavan kala pyni ia ka jingleh jong ka Sorkar Meghalaya ia ka jingpyrshang ban bteng ha kaba pynkupbor ia ki briew kiba na ki shnongki thaw bad ban wad ia ki jingpyrshang kiba thymmai bad ia ki lad ki lynti na ka bynta ka jingroi ha ka ioh ka kot.
