Shillong, Naitung 16 : Haba batai ia ka jingpher ka rukom bat khyndew hapoh ka Jylla, u Myntri Rangbah ka Jylla Conrad K Sangma, ula pan jingkyrshan naka Sorkar Pdeng ban ai lem ia ki jingmyntoi jong ka PM KISAN sha ki Nongrep “kiba iarep da ka shnong ne ka Kur’ hapoh ka Jylla.
U Myntri Rangbah ula iakynduh ia u Myntri ka Sorkar Pdeng ba khmih ia ka kam rep Shivraj Singh Chauhan ha ka sngi Ba-ar ha New Delhi, ba batai bniah ia ka jingpher ka ain bat khyndew ha Meghalaya kaba hap hapoh ka Sixth Schedule jong ka Riti Synshar ka Ri.
Ula ong, namar kane ka jinglong pher ka rukom iabat khyndew, ka Jylla Meghalaya ka don ia ki trai jaka kiba dei da ka Shnong ne ki Kur. “Ha ka jaka shnong, ia ki jaka la ju aiwai sha ki nongshongshnong ba kin rep kin riang” ula ong.
U pyntip ba ha ki jaka kur pat, ki nongrep kila ioh ka lad ban rep ha ki katto katne ki bynta jong ka jaka da ka jingbit jong ki nongialam. “Ha baroh kine ki arjait ki jaka rep, kam shym la don satia kano kano ka kot ka sla halor ka jinglong trai ba shimet ia ki jaka” ban jur u CM.
Ula ban jur ba namar ka jingbym don ia ki kot ki sla ne ki dulir, kiba bun na kine ki nongrep kim shym la ioh satia ia ki jing myntoi kaba ki nongrep ki ioh na ka PM KISAN scheme.
U Conrad ula pyntip ruh ia u Myntri ka Sorkar Pdeng ba ula dep iakren teng ia kane ka kam bad ka Ministry ha ki snem bala leit noh.
Haba ai nuksa ia ka Manipur, ha kaba ka Sorkar Pdeng kala pynjynsur ia ki kyndon na ka bynta ki nongrep kat kum ka para 3.5.1 jong ka PM KISAN scheme, u Conrad ula kyrpad ia u Chauhan ban ai lem ia kajuh ka jingpynjynsur ia ki paid nongrep ka Meghalaya.
