Shillong, Naitung 11: Ka North Garo Hills Job Reservation Policy Coordination Committee (NGHJRPCC) hynne ka sngi palei kala aiti ia ki jingai jingmut sha ka Expert Committee on Reservation Policy ha ka nongbah Shillong.
U President ka NGHJRPCC u Jagir M Sangma, ula ban jur ia ka jingdonkam ban pynneh kumjuh ia ka bhah thungkam thungjam bad ula pynpaw ruh ha kaba iadei bad ka jingsahdien ka ioh ka kot bad ka rukom im hapdeng jong ki jaidbynriew Garo, Khasi bad ki Jaintia.
Ha ka shithi kaba la phah da ka NGHJRPCC kala pynpaw “Ngi kyntu ia ka committee ba kan pdiang ia ka jingkyntu ka jong ngi ban pynneh pynsah kumba ka long ia ka Reservation Policy da kaba pynshong nongrim ia ki daw kiba la pynpaw”.
Ka committee kala pynpaw ba ka Job Reservation Policy ka Meghalaya, kala mih lyngba ka Article 15(4) bad 16(4) jong ka riti synshar ka ri India, ia kaba la pynwandur ban pynthikna ba kan don ka jingiohlad ban iohkam iohjam bad ka lad ban ioh pule puthi ki jaidbynriew Khasi, Jaintia bad Garo. Watla kala don lypa katei ka rukom bhah hynrei ki jaidbynriew Garo ki dang mad iaka jingshah leh shilliang khmat ha ka rukom sam ia ka jingmyntoi.
Ka NGHJRPCC kala kdew ruh ba katkum ka khanasamari jong u snem 2022 jong ka jingdon ki nongtrei sorkar jylla kala pynapw ba kala long kaba noh shilliang.
“Ki Khasi bad Jaintia ki don 35,031 (61.69%) na ka 56,790 ngut ki Scheduled Tribe Employees, katba ki Garo ki don tang 19,874 (35%)” la pynpaw ka Committee.
Kila pynpaw ba kitei ki jingkhein kila pyni ia ka jingduhlad ki Garo ban shah thungkam ha ki kam sorkar bad ka Committee kala pynpaw ba ym shim la pyntreikam thikna ha ka rukom kaba dei ia ka Reservation Policy kaba la pynduhnong kylla iaki jaidbynriew Garo.
Ka NGHJRPCC kala pynpaw ba ka jingpynbeit ne jingpynkylla thymmai ia ka policy kan ktah jur ia ki jaidbynriew Garo bad kan lam sha ka jingbym shngain ka lawei ka jongki ha ka imlang sahlang bad kila banjur ba ki jingeh kiba la iakynduh lypa da ki Garo kynthup ka jingduna ha ka jingleit pule, ka lad ban iohkam bad ban ioh ban pule ha ki kyrdan kiba heh, kumta donkam ban pynneh kumba ka long ia katei ka policy.
Ka Committee kala ai jingmut ban pynneh beit iaka Reservation Policy bad ban pynthikna ba ki Garo kin ioh ia ka bhah kumba kidei ban ioh ban leh ia ka jingkhmih bniah bad ban lum jingtip ia ka jinglong ha kaba iadei bad ka ioh ka kot bad ka imlang sahlang ban peit ia ka jingdonkam ha ka reservation policy.
Kala pynpaw ruh ba donkam ban peit ha baroh ki liang khamtam ha kaba iadei abd ki aiñ ki kanun kiba iadei bad ka jingpynkylla ia ka policy kaba lah ban long kum ka jingniew beiñ.
Ban iasyllok bad ki nongmihkhmat na ka jaidbynriew Garo da kaba leit ha ki jaka ban sngewthuh khambha ia ka jingsngewkhia bad ha ki bynta bapher bapher.
Ka
kala pynkut da kaba pynpaw iaka jingskhem jingmut ba ka Expert Committee kan pdiang ia ki jingai jingmut ka jongki bad kan wanrah ruh ia ka jingpynkylla katkum ka jingpynshong nongrim ia ka Reservation, ban pynthikna ba ka jingbhah kan long kaba mar katjuh ia barohki jaidbynriew ha Meghalaya.
 hynne ka sngi palei kala aiti ia ki jingai jingmut sha ka Expert Committee on Reservation Policy ha ka nongbah Shillong.){kind=link}