Jowai, Naitung 11 : Haduh 99 % ki paidbah jong ki 10 tylli ki MDC constituency ka JHADC ba hap hapoh ka East Jaintia Hills District, kila pynpaw ia ka jingpyrshah ban pynkylla thymmai ia u pud u sam jong ki constituency.
Kane ka sur kala mih ha ka Public Hearing bala pynlong da ka Delimitation Committee ka JHADC na ka bynta ki 10 tylli ki MDC constituency ba hap hapoh EJH District, kaba la pynlong ha ka sngi Palei ha Community Hall, Khliehriat West.
Kine ki constituency ki kynthup ia ka Muthlong-Sohkymphor, Tuber, Musniang-Rangad, Rymbai-Khliehriat, Sutnga-Narwan, Sutnga-Nongkhlieh, Sumer, Saipung-Nongkhlieh, Narpuh, bad ka Bataw-Lakadong.
Ha kane ka hearing, u MDC ka Saipung Nongkhlieh constituency Bah Arborhima Darnei ula pynpaw ia ka jingpyrshah ban kynthup shuh shuh ia ki shnong hapoh ka constituency jong u da kaba ong ba kane ka constituency ka dei kaba la pynkha naduh u snem 1967 da ka jingthmu ban ai jingiada ia ki jaidbynriew Baite kiba sah hapoh ka District. Ula ong ba ka jingpynrung shuh shuh sa ia kiwei ki shnong ba sah da kiwei ki Jaidbynriew kan sa ktah ia ka jingmang kyrpang ia kane ka constituency sha kane ka Jaidbynriew.
Ula kyntu ia ka Committee ba kan nym ktah ia ka constituency namar ka Jaidbynriew Baite ruh ki dei kiba iadon bynta lang ha ka jingiakhih ban ioh Jylla la ka jong.
U Wahheh Chnong bad Secretary ka Shnong Shnongrim, kaba sah da ki Pnar, kila pyrshah jur ban shah kynthup noh sah ka Saipung Nongkhlieh Nongstituency.
Haduh 99 % na ki nongshongshnong kiba iashimbynta ha ka public hearing kila pyrshah jur ban pynkylla thymmai ia ki constituency halor ka nongrim ba ki iapher na u pud u sam, ka jinghngai, ka jingjynjar ha ka synshar khadar bad kiwei kiwei.
U Chairman jong ka Committee ula kyntu ia kiba don ka jingpyrshah na ka District ba kin phah ia ki jingpynsngew bad jing ai jingmut jong ki sha ka Committee hapoh ka 3 baje janmiet jong ka 19 tarik Naitung.
