Shillong, Naitung 10 : Ka Kynhun Myntri ka Sorkar Jylla ha ka sngi Balang kala mynjur ia ka Standrad Operating Procedures (SOPs) ban pynthikna ba ka jingthungkam bad jingkyntiew kyrdan ha ki Tnad bapher bapher ka Sorkar kan long da ka por.
Haba kren sha ki lad pathai khubor hadien ka jingialang, u Myntri Rangbah ka Jylla ula ong “Kane ka SOP ka dei kaba hap ban pyntreikam noh mynta da ki Head of Department (HoDs) bad kumjuh ruh kiwei ki tnad ba khmih ia ka thungkam thungkam”.
“Ka Cabinet kala wanrah ia kane ka SOP na ka bynta ban pynlong ia ki eksam, pynbna result, jingpynbna laitkam bad jingpyntip ia ki kam ba lait khnang ba ka rukom thungkam kan iaid sted noh” ula ong.
“Kumta, yn sa bthah ia baroh ki tnad ban pynthikna ba ki dei ban ai jingtip ia ki kam kiba lait hapoh ka por kaba la buh” ula bynrap.
U Conrad ula ong ruh “Wat ka MPSC, District Selection Committee (DSC) lane ki Department Selection Committee kiba don, kin ioh da ka por ban pyndep ia baroh ki kam kiba lait bad ka jingpynlong ia ka eksam ruh kan long noh kaba kham suk bad ba iaid beit. Ka jingpynbna ia ka result ruh kan long noh ha ka lynti kaba janai bha”.
U Myntri Rangbah ula ong ruh ba ka Sorkar kala buh da ka por ia ki Department Promotion Committee ba kin kyntiew kyrdan ia ki Nongtrei mar syn don ka jingshongthait khnang ba kan nym shimpor shuh da 3-5 bnai ban kyntiew kyrdan kumba la jia ha ki por bala leit noh.
