Shillong, Naitung 09 : Khatsaw ngut ki samla ba pass Post Graduate bad hynriew phew hynriew ngut ki Graduate ki dei napdeng ki 104 ngut ki Pulit Unarmed Branch Recruit Constable (UBRC), kiba la pyndep ia ka jinghikai pyntbit hapoh ka Training Centre jong ka 6th Battalion ka Meghalaya Police ha ka sngi Ba-ar.
Kine ki UBRC ki kynthup ruh ia arngut kiba la pass Diploma bad 22 ngut kiba pass HSSLC.
Ia ka passing out parade jong kine ki UBRC ka batch ba 4, la wan ban bishar da ka Director General of Police (DGP) Kong Idashisha Nongrang.
Haba ai khublei ia kine ki samla ba rung kam pulit thymmai, ka kong Nongrang kala ong “Nga sngewkmen ban iohsngew ba ki don bun ki samla ba pass graduate bad post graduate napdeng ki 104 ngut ki UBRC. Kane ka dei ka jingkylla naba ngim don don ia ki graduate ne post graduate ban rung kam Pulit langrut ha ka tnad Pulit. Ngi pdiang da ka jingkmen ia kane ka jingkylla”.
“Kam pher phi wan na kano kano ka longiing, ne kano kano ka kyrdan pule, phi la don mynta bad ka Tnad Pulit, la khmih lynti ia phi ban don discipline” kala ong.
“Nga shim ruh ia ka kabu ban ai khublei ia ka Armed Training Centre bad baroh ki nonghikai, kiba la minit ban pynthikna ba kine ki 104 ngut ki Pulit langrut ba 7 ngut ki followers, kiba don bynta ha ka parade mynta ka sngi. Ki dei ka nuksa ia baroh ki jingtrei shitom bad ka jingaiti ha ka kam kaba phi ki nonghikai phi la ai ha ki” kala ong.
Haba ai jingkren, u Commandant ka 6th Battalion Rituraj Ravi ula pyntip ba ka 6th Battalion ka dei kaba la pynkha ha ka 28 tarik Kyllalyngkot 2011 bad la pynkynriah ia ka sha ka campus ba pusa kaba don ha Umran naduh u snem 2018.
“Watla ngi dei ka battalion ba thymmai, ka synniang jong kane ka training centre bad ka 6th battalion kala kren hi dalade” ula ong.
Ula pyntip ba ki 104 ngut ki UBRC ki dei na baroh 12 tylli ki District ka Jylla bad kin leit trei ha ki 7 tylli ki DEF. Haba kren halor ka kyrdan pule, u Ravi ula iathuh ba 2 ngut ki dei kiba la pyndep ia ka diploma, 22 ngut kiba la pass HSSLC, 66 ngut ki Graduate bad 14 ngut ki post graduate.
Ha kane ka sngi, ka DGP kala sam ruh ia ki trophy sha ki nongjop.
U Batsrang A Sangma (Nongpoh DEF) ula ioh ia ka khusnam best trainee ha ka physical training, Toribateibok Ksiar (Baghmara DEF) ha ka best disciplined trainee, Mike Donbor Marngar (Tura DEF) ha ka best trainee indoor subjects, Monkiru Dhar (Tura DEF) ha ka best trainee ha ka outdoor subjects, Iohlang Lathong (Baghmara DEF) ha ka best trainee jong ka firing bad Saurav Bhusha (Baghmara DEF) ha ka best cadet trainee.
