Shillong, Naitung 03 : Ka Meghalaya Cricket Association (MCA) kala pynbna ia ka kyrteng ki 30 ngut ki rang ialehkai senior ki shynrang, ki ban mihkhmat ia ka Meghalaya sha ka lympung ialehkai ka BCCI jong u snem 2024-25, ka ban dei ruh ka samoi ialehkai ban sah khana ia ka Meghalaya.
Kane ka samoi kan sah khana namar ka Meghalaya kala ioh rung sha ka Elire Category jong ka Ranji Trophy 2024-25 hadien ba kala wan runners-up ha ka Plate Group jong u snem 2023-24, ka jingjop kaba kham dondor namar ka Jylla kala pynialehkai tang ki rang ialehkai kiba napoh ka Jylla.
Mynta ka samoi, ka First Class Ranji Trophy kan dei ka lympung ialehkai ba hehduh bad ba nyngkong eh ia ka kynhun ialehkai ka Meghalaya senior men’s team, ka ban sdang naduh ka 11 tarik u Risaw. Hadien kane kan bud da ka T20 Syed Mushtaq Ali Trophy naduh ka 23 tarik Naiwieng bad ka One Day Vijay Hazare Trohy naduh ka 21 tarik Nohprah.
Ka MCA haba pyntreikam ia ki jingai jingmut ka Adhoc Selection Committee, kala jied ia 30 ngut ki rang ialehkai na ka bynta kane ka samoi ialehkai, ia kiba la pynshong nongrim na ki jingialehkai bha ha ka samoi ialehkai 2023-24 hala iing bad ha ki jingialehkai bala pynlong dang shen ha Jagiroad, Assam.
Ka MCA kan pynlong ia ka selection-cum-preparatory camp hashuwa jong kine ki lympung ialehkai ka ban long shibnai shuwa ban sdang kine ki lympung. Ia mynta, la bthah ia ki rang ialehkai ba kin pynkhlain ia ka jingkilan bad jinghikai pyntbit ialade.
Ki rang ialehkai kiba la shah jied ki long :
Chaman Pushp, Swarajeet Das, Aryan Borah, Bijon Dey, Nishanta Chakraborty, Jaskirat Singh Sachdeva, Adarsh Joshi, Kishan Lyngdoh, Arpit Bhatewara, Bamanbha Shangpliang, Himan C Phukan, Shambhalang Pyngrope, Wallambok Nongkhlaw, Anish Charak, Arbin Singh, Sylvester Mylliempdah, Riboklang Hynniewta, Rohit Shah, Akash Kumar Chaudhary, Ram Gurung, Robert Sangma, Pankaj Mandal, Roshan Warbah, Dippu Sangma, Ibitlang Thabah, Arien Bonchang Sangma, Yogesh Tiwari, Md Nafees Siddique, Chengkam Sangma, Lerry Sangma
