Guwahati, Naitung 03 : Khatduh u Myntri Rangbah Duh ka Ri ula ai jingkren bad pynkut ia ka jingshngap jar halor ka jingjia ha Manipur bad ban jur ba ka long kaba donkam ban tem ia ka jinglong jingman da ka jingstad bad ka jingiai shah.
Haba jubab ia ka motion ai khublei ia ka jingkren lamphang ka President ha Rajya Sabha, u Myntri Rangbah Duh ula ong ba ka Sorkar kala pyrshang khlem shongthait ban pynjaijai ia ka jinglong jingman ha Manipur. Ula bynrap ba kila don haduh 11 hajar tylli ki ejahar bala mudui bad palat 500 ngut ki nonglehtam kila shah kem hapdeng bad hadien ka jingia umsnam.
Ka jingpynrem kaba jur kala mih pyrshah ia u Myntri Rangbah Duh namar ka jingsngap jar jar khlem da kren shi kyntien ruh halor ka jingjia ha Manipur wat hapdeng ka jingiaumsnam kaba la ishyrkhei.
Haba shimkhia ia ka jingiakynad kaba la neh naduh u snem 1993 ha Manipur, u Modi ula ban jur ba ka long kaba donkam ban tem ia ka jinglong jingman da ka jingstad bad jingiai shah. Ula khot sngewbha ia baroh ki briew kiba sngewthuh ba kin iarap lem ia u ha ka jingpyrshang ban wanrah pat ia ka jingjai jai bad jingsuk ha Manipur.
“Ngi dei ban pdiang ia ka jingshisha ba ki jingjia iaumsnam ha Manipur kila nang duna kaba mut ba ka jingkyrmen ka don ban wan pat ka jingsuk. Kumba long mynta, ki skul, ki college, ki Ophis bad kiwei ki jaka treikam kila treikam kumba ju long ha Manipur” ula ong.
U Myntri Rangbah duh ula pyntip ba ka Sorkar Pdeng bad ka Sorkar Jylla ki dang iai bteng ban iakren bad baroh ki kynhun ha kaban wanrah pat ia ka jingsuk ha Manipur. Ula iathuh ba u Myntri kam Pohiing dalade ula ialam nakhmat eh haka ban pyrshang ban wanrah pat ia ka jingsuk ha Manipur. Ula bynrap ba wat ki heh Sorkar kila trei khlem shongthait ban wad ia ka lad ka lynti ban pynbeit ia ki jingeh kibamih bad ban pynthikna ia ka jingsuk.
U Modi ula pynkynmaw ia ka Rajya Sabha ba ka jingiakynad Jaidbynriew ha Manipur ka dei kaba la suhthied bha naduh ki snem bala leit noh, kaba lam sha ka jingpynjari ia ka jingsynshar President haduh 10 sien naduh ba ioh ia ka jinglaitluid ka Ri.
