Shillong, Jylliew 27 : U Deputy Inspector General of Police (Eastern Range) Davis NR Marak ha ka sngi Palei, ula pyntip ba ka tnad Meghalaya Police kala long kaba la khreh ban pyntreikam noh ia ki ain kam bymman ba thymmai, ki ban sdang treikam naduh ka 1 tarik Naitung.
“Haba ong ia kata, ngin sa tip ia kiei ki jingtynjuh ynda ngi la sdang ban pyntreikam ia ki. Hooid, ngi la pyrshang ban leh ia kaba bha duh ban pynkhreh ialade ha kaban pyntreikam ia kine ki ain” ong u Marak haba iakren bad ki lad pathai khubor shabar jong ka workshop ba long ha Nongbah Shillong.
Ki lai tylli ki ain ba thymmai bala mynjur da ka Iingdorbar Parliament ki kynthup ia ka : the Bharatiya Nyaya Sanhita (BNS), the Bharatiya Nagarik Suraksha Sanhita (BNSS), bad the Bharatiya Sakshya Adhiniyam (BSA), ki ban bujli ia ka Indian Penal Code 1860, the Criminal Procedure Code 1973, bad the Indian Evidence Act 1872.
“Ngi la dep pynlong ia ki jingai jinghikai kaba bniah bha ia ki Heh Pulit, kiba dei ban pyntreikam ia kine ki ain thymmai bad ngi kyrmen ba kila sngewthuh ia kaei kaba kila ioh jinghikai. Kumta mynta ngi hap ban pyntreikam ia kaei kaba la ioh jinghikai” ula ong.
Haba kylli, u DIG ula ong ba ka ain ba mynta kaba long pyrshah ia ki kam bymman pyrshah ia ki Kynthei bad ki Khynnah ki dei kiba la pynkhlain bha.
“Ngi don ka jingkyrmen ba kine ki ain thymmai kin iarap ban pynduna ia ki kam bymman pyrshah ia ki kynthei” ula bynrap.
