Shillong, Jylliew 27: Ka Myntri ka koit ka khiah Dr Ampareen Lyngdoh hynne ka sngi Palei, kala ong ba ka Sorkar kan ialeh ban kyntiew bad pynbiang noh ia ki jingdonkam jong ki jaka ai jingsumar kiba don ha nongkyndong khnang ba kin lah ban ai ka jingshakri kaba bit kaba biang ia ki paidbah nongshongshnong.
“Nga la shong bishar kam bad ki heh Ophisar ka koit ka khiah ka jylla, namar ha ka jingleit jurip ka jong nga ia ki jaka ai jingsumar kiba don ha nongkyndong, nga la shem ba ki don katto katne ki mat kiba donkam ban khmih noh mardor bad ban peit ba kine ki jaka ai jingsumar kin long kiba bit ba biang” ong ka Kong Ampareen haba iakren bad ki nongthoh khubor.
Kala ong, “Kila iakren halor ka jingbym don ki sanction post (ka jingthungkam bala mang pisa) bad la bthah ba ki dei ban wad jingtip mardor ia ki jaka sumar ki bym pat don ia ki sanction post, namar kam don jingmyntoi ia ngi ban plie ia ki jaka sumar lada ym don iaki sanction post ban lah ban ai ia ka jingsumar kaba bit ba biang”.
“Ngi donkam ban peit ba ki doctor kiba don ha kano kano ka jaka, ym dei ban pynbunkam than ia ki doctor ba kin peit ia ki kam ban pyniaid ia ki jaka sumar hynrei ki doctor kidei ban aipor khambun ha kaban sumar ia ki paidbah. Nga la ong ia ki ophisar ba mynta ba ki donkam ban peit na ka bynta ban pynlaitluid ruh ia ki doctor namar lada u doctor u hap bunkam ha kaban pyniaid iaki prokram bapher bapher khamtam ha ka jingbthah jong ka sorkar pdeng kim don por shuh ban peit ia ki nongpang bad kane ka long ka jingduhnong kaba khraw ia ki nongpang” kala bynrap.
Ka Myntri kala pyntip ruh “Nga la pynkynmaw ruh iaki heh ophisar ba lada plie ia kino kino ki jaka ai jingsumar dei ban peit ba ki kam kiba bhah ne sanction ha kitei ki jaka kidei ban don lypa ym ban plie ia ka jaka sumar hynrei ym don pat ki nongtrei. Kane kan pynmih iaka jingeh ia katei ka jaka sumar ban ai iaka jingshakri”.
Kala iathuh, ba ha ka jingwan jurip ia ki katto katne ki jaka sumar, kala shem ba ka long kaba donkam ban maramot ne ban shna pynbha noh ia ki jaka sumar kiba la rim bha bad ha ka por slap kala don ka jingjaw um, kumta kum kitei kim dei ban jia bad bun ki jaka sah jong ki doctor bad ki nongtrei ruh kim long kiba biang, kumta kan rah ia kane ka mat sha ka sorkar ba kan bhah ia ka pisa.
Ka Kong Ampareen kala ong ruh ba kan sa leit sha Delhi ban iakynduh ia ki Myntri Sorkar ban pan ia ka mang tyngka kaba bit ba biang khnang ba yn lah ban pynbit pynbiang ia ki jaka sumar kiba don ha kylleng jong ka jylla.
