Shillong, Jylliew 26 : Ka Meghalaya Assembly Committee on Women Empowerment kala pan ia ka kaiphod ba kyrkieh na u Superintendent of Police ka West Garo Hills, Abraham T Sangma, halor ka jingshah shoh tohmet ka Kynthei ha ki saw ngut ki shynrang ha Lower Teksragre, Damal Asim.
Ka Assembly Committee kala shimkhia ia kane ka jingjia hadien ka jingiohi ia ka jingshah leh tohmet kane ka kynthei lyngbaka video bala saphriang ha ki social media.
Saw ngut ki briew kila patan ia kane ka kynthei na shniuh bad bom naphang da u siej khlem ka jingisynei wat hapdeng ka jinglyniar bad jingkyrpad ban sangeh ia kane ka jingpynshitom ba palat pud.
Kat kum ka jingiathuh ki Pulit, arngut na kine ki briew kila shah kem katba arngut pat ki dang phetrieh. Ki Pulit kila register case ia kane ka jingjia ha Tura Women Police Station hapoh ki kyndon ain bapher bapher.
Ka Chairperson jong ka Assembly Committee on Women Empowerment, Kong Santa Mary Shylla, kala shimkhia marmar halor kane ka jingjia bad kala phone ia u SP ka WGH bad bthah ba un pynkloi ia ka jingtohkit bad ban kem ia baroh ki briew kiba donkti.
Ka Chairperson kala pyntip ruh ba kan sa leit hiar shen sha Ri-lum Garo bad kyntu ia u SP ka WGH ban pynbeit ia ka jingia lang bad ki bahaiing jong kane ka lanot. Ha kane ka jingleit jong ka, ka kong Santa ka don jingthmuban bthah ia baroh ki SP bad ki Heh Pulit ba kin pynthikna ba kum kine ki jingjia kim dei ban jia shuh.
Haba kynthoh ia kane ka jingjia, ka kong Santa kala pynpaw ia ka jingbynniaw bad ong “Ka long kaba sngewsih ba ki Kynthei kin shah shoh hakhmat u paidbah. Ka dei ka bym khmih lynti satia. Ka dei ka kam bymman kaba khraw eh ha ngi. Ka Sorkar kan sa leh ia kaba donkam bad ki kynthei kim dei satia ban don ka jingsheptieng. Ki dei ban tip ban gin sa bthah ia baroh ki SP ba kin peitngor bad shimkhia bha ia kino kino ki kam bymman pyrshah ia ki Kynthei”.
