Shillong, Jylliew 25 : U Myntri ka Tnad Pule Puthi Rakkam A Sangma ha ka sngi Ba-ar, ula pyntip ba ka Tnad kala phah ia ka jingtyrwa sha ka Tnad Pla Tyngka ban mynjur lem ha kaban pynkiew ia ka tulop jong ki palat 1200 ngut ki Nongtrei ka SSA (Non-teaching staff).
Haba iakren bad ki nongthoh khubor, u Rakkam ula pyntip ba ka kynhun ki Nongialam ka All Meghalaya SSA Non-Teaching Staff Association (AMSSANTSA) kila wan iakynduh ia u ban iakren halor kane ka kam.
“Ha ka jingshisha, ka Tnad kala dep phah ia ka jingtyrwa bad ka file kala don bad ka Tnad Finance bad ki kam kila iaid mynta bad ngi dang ap ba kin pyndep. U Myntri Rangbah ka Jylla u tip bha ia ki kam ba iaid bad ngin sa leh ia kaba donkam. Ngi khmih lynti ba ka Tnad Finance kan sa shim ia ka rai kaba donkam” ula ong.
Haba kylli, u Rakkam ula ong “Ka Tnad Pla Tyngka kan sa shim ia ka rai kaba khatduh ia kaban pynshong nongrim na ka jingdon pisa jong ka Jylla”.
Haba pynpaw ba ka jingdawa jong kane ka seng ka dei kaba don hok, u Myntri ula ong “Ngi la kyrpad ia ki (Nongialam) ba ka jingiakhih kam dei sati aka lynti ban pynbeit”.
Ula pyntip ba ki Nongialam kila kular ba kin nym pyniaid shuh shakhmat ia ka jingiakhih namar ka Sorkar kala dep ban shimkhia ia kane ka kam.
Kat kum ka jingong jong u, ka jingpynkiew tulop ba khatduh eh ka dei kaba la leh ha u snem 2016.
