Shillong, June 23: Ka ‘SOS Children’s Village, Shillong, hynne ka sngi U Blei, kala rakhe ia ka jingdap 60 snem ka SOS Day ha ryngkat ka Ri India baroh kawei.
Iaka ‘SOS Day’ la rakhe ha baroh kawei ka Ri India man ka 23 tarik Jylliew bad ia kane ka sngi la rakhe kyrpang namar ka dei ka sngi kha jong u Dr. Hermann Gmeiner uba la seng iaka SOS Village ha baroh kawei ka pythei.
Ki jaka ri khunswet lane ki ‘SOS Children’s Villages’ ki don 135 tylli ha baroh kawei ka pyrthei bad haIndia ki don haduh 31 tylli kynthup kawei ha Meghalaya kata ka SOS Children’s Village Shillong, kaba don ha Umiam.
Iaka ‘SOS Children’s Village Shillong’ la seng naduh u snem 1996 bad la plie ia ka ha u snem 1999.
Ka thong jong ki jaka ri khunswet ‘SOS Children’s Village’ kadei ban ai ka longing ia kito ki khynnah kiba la duh noh iala ki kmie ki kpa.
Ka jingiapher, ka SOS Children’s Village bad kiwei ki jaka ri khunswet, ka long ba ki khunswet kin ioh im bad kiwei pat ki khunswet haka iing ha ryngkat bad ka kmie ka ban peit iaki haduh da ki lah heh la san.
Hapoh ki SOS Children’s Village, ki khynnah ym tang ba ki ioh ban im hapoh ka iing kum kiwei ki khynnah kiba don iala ki kmie ki kpa hynrei ki ioh lut iaka jingnang jingstad daka jingioh ban leit pule sha ki skul bapher bapher.
Nalor ka jingnang jingstad, ki khynnah ki ioh ki jait shah hikai pyntbit khnang ba kin lah ban ioh kam ioh kam bad ban lah ban ieng hala ki jong ki kjat, da ki la mih noh na kane ka jaka ri khunswet.
Ha kane ka jingrakhe dap 60 snem, ka SOS Shillong kala rakhe daka jingpynlong bun jait ki prokram, nalor ka jingsam khusnam iaki khynnah kiba wan shakhmat haki eksamin.
U Myntri ka tnat Social Welfare u Bah Paul Lyngdoh, ula wan shim bynta lang bad ki khunswet jong ka SOS Children’s Village Shillong ban pynshongkun ia kane ka jingrakhe.
Haba kren ha kane ka sngi u Bah Paul Lyngdoh ula ai ka jingiaroh iaka SOS Children’s Villages India, kaba la lah ban kyrshan bad pynlong briew man briew iaki khynnah kiba la duh noh iala ki kmie ki kpa.
Haka jingkren u Bah Paul ula kyntu iaki khynnah ba kim dei ban duh mynsiem ne jingkyrmen hynrei kidei ban don ka mynsiem ba kyrmen ba maki ruh, kim don ka jingduna ne ka lad ban kiew shaphrang, kum kiwei pat.
