Selsella, Nailar 11 : U Myntri Rangbah ka Jylla Conrad K Sangma ha ka sngi Palei u la buh ia u mawnongrim ban tei noh ia ka sub centre ba thymmai ha Chambagre kaba hap ha Selsella Block, West Garo Hills.
We will construct 300 New Sub Centres across the State in the next 3-4 years. We have earmarked ₹165 Crores for upgradation of rural health facilities@mansukhmandviya
— Conrad Sangma (@SangmaConrad) August 11, 2022
Ia une u maw nongrim la buh ha ryngkat ka jingdon lang ka MLA ka thain ka Ferlin Sangma, Thomas Sangma bad ruh u Marcuise Marak.
Haba buh ia une u Mawnongrim jong ka Sub Centre kaba dei shibynta jong ka Model Health Sub-Centre, u Myntri Rangbah ka Jylla ula ong ba ha kine ki lai snem ban wan, sa kumba 300 tylli ki Sub Centre yn sa tei hapoh ka Jylla.
U iathuh ba ka Sorkar kala dei buh ia ka mang tyngka kaba T.165 klur na ka bynta ban tei ia kitei ki sub centre.
“Da ka thong ban kyntiew ia ki jaka ai jingsumar kiba don ha kylleng ki bynta jong ka jylla, ka sorkar ka la rai ruh ban pynwan dur ia kine ki jaka sumar da kaba pynbiang ia baroh ki jingdonkam ban lah pynjanai ia ka jingshakri jong ki,” ong u Myntri Rangbah.
Ia katei ka projek ka sorkar ka la iateh bad ka SELCO Foundation bad ruh bad ka Saura Mandala.
Katkum ka jingong jong u Myntri Rangbah, kitei ki health Sub Centre kin long ki jaka ai jingsumar kat kum ka juk mynta da kaba pyndonkam da ki kor ki bor ka juk.
Shuh shuh u ong ba da ka thong ban pynkhlaiñ ia ki jaka ai jingsumar ha ki shnong ki thaw, ka sorkar ka la pynkhreh ruh ban pynkup bor wat ia ki bor shnong lyngba ki Village Health Council.
La pyntip ruh ba lyngba ka Meghalaya Health Infrastructure Strengthening Project la mang haduh T.350 klur na ka bynta ban kyntiew kyrdan ia ki PHC bad CHC ha ka jylla.
U Myntri Rangbah u la pyntip ruh ba ka jingtei ia ka PA Sangma Medical Skill Hunar Hub ba T.280 klur ka la iaid mynta ha Dumindikgre kaba don hajan Babadam West Garo Hills bad kane kan iarap ia ka Jylla ban ioh ia ki briew kiba la tbit ki ban ai ka jingshakri sha ki jaka nongkyndong bad kan plie lad ruh ia ka iohkam iohjam.
