Jingkieng Umiam | Da ki kyndon yn buh ka MeECL ban shngain bad neh ka Jingkieng

Lah pyndait kor CCTV ban pynthikna ban nym iaid ki kali ba kit khia

Shillong, Jylliew 21 : Ka Tnad MeECL kan sa pynjari shen ia ka kyndon ba haduh katno ka jingkhia jong ki kali ba lah ban iaid na jingkieng Umiam hadien bala dep ban shna pynkhlain ia ka dam bad pynbha ia ka jingkieng.

Haba pyntip ia kane hynne ka sngi Thohdieng, u Chairman-cum-Managing Director (CMD) ka MeECL Sanjay Goyal ula ong “Ka jingbuh kyndon kan don beit. Ngan kren da kaba shai ba kane ka jingpynkhlain ia ka dam bad jingkieng ka long eh ban pynneh ia ka kumba ka dei ban long khnang ba kan nym don shuh ka jingjulor jong ka jingkieng hadien habud”.

“Ngi dang iakren bad ka Indian Institute of Technology (IIT), Guwahati bad ngin sa wanrah ia ka jingpynbna halor ki kyndon ba buh ia ka jingkhia ki kali hadien bala pyndep lut ia ki jingshna baroh bad ngin sa pyrshang ban pynthikna ba kine ki kyndon kin dei kiba bud thik pa thik” ula ong haba bynrap ba ka Tnad kala buh ia ki CCTV camera ban pynthikna ba ki kali ba kit khia kim dei ban iaid shuh lyngba ka dam.

Kat kum ka jingong jong u, ka jingshna pynkhlain ia ka dam bad ka jingkieng kan dep haba kut jong u Naitung. Kumba T.24-25 klur la pynlut haba pyntreikam ia kane ka project.

“Kane ka dei ka jingtei u paidbah bad ka jingthmu jong kane ka jingtei ka long ban pyniasoh…to ngin nym leh satia ia kano kano ka kam ka ban pynjulor ia ka jingkieng bad buh ha ka jingma. Lyngba jong phi nga kwah ban ong ba kane kam mut ba mynta kane ka jingkieng kala plie ia baroh ki kali ba kin iaid” ong u Goyal.