Shillong, June 20: U Lamphang jong ka ïingdorbar thawaiñ ka jylla u Thomas A. Sangma hynne ka sngi ula ong ba shen yn sa lum ia ka jingialang jong ki seng saiñ pyrthei ban iakren ia ka kam jong u Nongialam ka Liang Pyrshah bad u Chief Whip ka Liang Pyrshah.
Hadien ba u Saleng A Sangma ula jop ia ka elekshon MP na Tura bad ula iehnoh ia ka kam kum u MLA ka Gambegre Constituency, katei ka Constituency kala sah thylli khlem don nongmihkhmat shuh. Kane ka jingiehnohkam u Saleng kala pynhiar ruh ia ka jingbun paid ka seng Congress hapoh ka ïingdorbar thawaiñ na ka 5 ngut sha ka 4 ngut.
Lah ban ong baroh shi katta ka seng Congress ka don 5 ngut ki MLA bad ka seng All India Trinamool Congress (TMC) ruh ka don 5 ngut ki MLA, hynrei da ka jingienohkam u Saleng, ka Congress kala don noh sa tang 4 ngut ki MLA bad ka AITC kala don noh ia ka jingbun paid kum ka seng ha ka Liang Pyrshah.
Kumba long mynta u Bah Ronnie V. Lyngdoh na ka seng Congress u dei u nongialam ka liang pyrshah ha ka ïingdorbar thawaiñ ka jylla.
Ia ka kyrdan Opposition Chief Whip, baroh shi katta la bat da u Saleng Sangma, hynrei hadien ba ula iohnoh kam kum u MLA, katei ka shuki ruh kala thylli noh. U Lamphang ula ai ksai ba yn sa shim ia ka rai halor katei ka kam hashwa ban sdang ka dorbar jongka ïingdorbar thawaiñ ka jylla.
Haba jubab halor ka jingpynkhamti iaka kam Leader of Opposition bad Opposition Chief Whip sha ka seng Congress watla ka Congress bad ka AITC ki don mar 5 ngut ki MLA, u Lamphang ula pynshai ba ka Voice of the People Party (VPP) kala phah ia ka jingtyrwa ia ka kyrteng jong u Saleng Sangma na ka bynta ka kyrdan Opposition Chief Whip ha u snem 2023. Kane kala lam ia ka seng Congress ban ioh ia ka kyrdan Leader of Opposition. Kane ka jingkren u Lamphang kadei hadien ba u Saleng Sangma ula resaiñ noh kum MLA ka Gambegre constituency.
