SHILLONG, JUNE 19: Ka Meghalaya Editors’ and Publishers’ Association (MEPA) hynne ka sngi Balang, kala pynkup burom ia ki ar ngut ki nongpathai khubor ka jylla kiba kynthup ia ka Alicia Bakor Phanwar bad ka Princess Giri Rashir ha ka jingialang kaba la long ha Shillong Club.
Kitei baroh ar ngut kiba la shah pynkup burom, kila ioh pdiang da ki Memento bad ka shithi ai jingithuh na ka MEPA.
Ka samla Alicia Bakor Phanwar kala jop ia ka ENBA Gold Award na ka bynta ka ‘Best News Producer’ ha ka 30 tarik u Lber, 2024 bad kadei ka nongpathai khubor kaba dang khynnah tam kaban trei kum ka Newsroom Supervisor ha ka India Today TV.
Katba ka samla Princess Giri Rashir kala jop ia ka Ramnath Goenka Award ha ka ‘Excellence in Journalism ha ka 19 tarik u Lber, 2024 bad ka tei kum ka nongpathai khubor jong ka East Mojo hapoh ka jylla Meghalaya.
Ia katei ka prokram pynkup burom la pyniaid da ka Treasurer jongka MEPA ka Kong Banda Blah bad la ioh ia ka jingkren na u General Secretary ka MEPA u Bah John W. Thabah, u President ka MEPA u Bah R Monarch Shabong, u Vice President u Rajib Choudhury bad ka Nongaibuit ka Kong Patricia Mukhim.
Haba kren ha ka jingialang ka Alicia Phanwar kala ai khublei ia ka MEPA kaba la pynkup burom halor ka jingjop ka jongka bad kala ong ba ka jylla Meghalaya ka dei ban don ia ka jaka ha ki National Media.
Katba ka Princess Rashir kala pynpaw iaka jingsngewnguh ia ka MEPA bad ong, ba kadei ka kamram jong ki nongpathai khubor ka Meghalaya ban shim ia ki ishu kiba ktah ia ki paidbah jong ka jylla da kaba trei shitom bad aiti met bad mynsiem khnang ba kitei ki ishu kin paw ha ki lad pathai khubor kiba don hapoh ka ri.
