Nongstoin, Jylliew 18 : Ki Nongshongshnong ka shnong Nongumkap kaba don ha West Khasi Hills, kila ap ia ka jing isynei jong ka Sorkar Jylla ban kner lem ia ki jingiarap namar ka jingim ba sohsat na ka jingwan jong ka lyiur manla u snem.
Ka Nongumkap ka dei ka Shnong kaba khatduh ne ha tduh eh jong ka West Khasi Hills District, kaba la don naduh u snem 1952, bad kaba don markhap ka East Garo Hills District, ia kaba la pyniakhlad tang da ka wah bala tip kum ka Wah Ryndi.
Ka Shnong Nongumkap ka shaniah tylli ia ki Shnong ba marjan ka East Garo Hills ban ioh ia baroh ki jingdonkam naduh ki marbam mardih, ka siew ka tda, ka dawai dashin haba pang ba shitom bad ter ter.
Hynrei ban leit sha kine ki shnong ka EGH, ki paidbah ki hap ban jam ia ka Wah Ryndi, kaba la pynbor ia ka Shnong ban shna dalade ia ka jingkieng dieng ba shipor tang ban ioh jam ia ka Wah. Kane ka jingkieng ka dei kaba neh tang ha ki ar-lai aiom bad tang shu poi ka lyiur, ka lad pyniasoh kala dkut noh namar ka jingshah rong umsaw.
Lah ban kdew hangne, kane ka Shnong haduh mynta kam pat ioh satia ia ka surok/lad pyniasoh hynrei da ka jingkitkhia hi jong ka Shnong bad ki Nongialam Shnong, ka lad pyniasoh ba don ha kane ka shnong ka dei tang ka surok khyndew bala shu pyntrei hi na ka skhim MGNREGS.
Dang ha ka 30 tarik Lber 2024, ki paidbah ka Shnong Nongumkap ha ka jingialam u Sordar Bah Jeremaia Dkhar bad u General Secretary Bah Samson K Kani, kila iamih paidbah ban shna ia ka jingkieng halor ka Wah Ryndi ban pyniasoh ia ka West Khasi Hills bad East Garo Hills khnang ban pynsuk ia ka leit iew leit hat bad ka iaid ka ieng.
Hynrei ka jingther u slap jong kane ka lyiur ba mynta, ha ka 16 tarik Jylliew, kane ka jingkieng kala shah rong noh ha ka umsaw bad pyndkut lut ia ki lad pyniasoh sha kane ka Shnong. Ka surok MGNREGS ruh kam long shuh ban iaid kali namar ka jingktieh palat haduh ba bun ki kali kiba sahkut bad ngam ha ka ktieh.
Namar kane ka jinglong jingman, ki Nongialam Shnong kila buh ka jingkyrpad ia u MLA bad MDC ka thain bad kumjuh ruh ia ki bor Sorkar ba kin phaikhmat lem sha ka shnong da kaba theh leh ia ki lad jingiarap khamtam eh ban pynshna ia ka jingkieng halor ka Wah Ryndi bad ban pynpoi ia ka surok bap aka sha ka Shnong.
