Imphal, Jylliew 18 : U Myntri Kam Pohiing ka Ri Amit Shah ula ban jur ia ka jingdonkam ban shim ia bun ki sienjam shisien shim ha kaban pynbeit ia ka thma iapher Jaidbynriew ha Jylla Manipur.
Ha ka sngi Nyngkong, u Amit Shah ula lum ia ka jingialang Hihgh Level ha New Delhi halor ka kam umsnam ha Manipur bad ong ba ka Sorkar Pdeng kan pynbun ia ki bor shipai lada donkam haba bthah ban leh da kaba tyngeh ia ki briew kiba donkti ha ki kam umsnam.
Ula ong ba ka Ministry of Home Affairs kan sa iakren ia baroh artylli ki kynhun, ki Meiti bad ki Kuki khnang ban lah ban wanrah ia ka jingiasngewthuh jingmut kham kloi kat kaba lah.
U Amit Shah ula bthah ia ki Heh Sorkar ban pynthikna ba kam dei ban nang biang ki kam umsnam ha kane ka Jylla ka thain Shatei Lam Mihngi ka Jylla.
Ula ban jur ruh ia ka jingbuh ia ki shipai ban wanrah biang ia ka jingshongsuk ha Manipur.
U Amit Shah ula shong bishar kam ruh halor ka jinglong jingman ki jaka riehthngen ba shipor khamtam haba iadei bad ka jingpynbiang ia ka bam ka dih, ka um, ki dawai bad kiwei kiwei ki jingdonkam.
Ula bthah ia u Chief Secretary ka Jylla ban pynthikna ba ki phetwir kin ioh ia ki lad jingsumar kiba paka nalor ban pynbiang ia ki jaka pule na ka bynta ki khynnah.
Ula bthah ruh ba dei ban leh da kaba tyngeh kat kum ka ain ia ki briew kiba donkti ban leh ia ki kam umsnam.
Palat 1000 ngut ki riewlum kiba dei na ki jaidbynriew Kuki bad Hmar kila leit riehtngen ha ki iing jong ki bahaiing hasem bad ki paralok ha ki artylli ki shnong– Haokippunji bad Hmarkhawlienin – kiba don ha Cachar District ka Assam hadien ba khie ka thma iapheer Jaidbynriew.
