Imphal, Jylliew 15 : Ka ding kaba klang bha, kala bam duh ia kawei ka Iing ba shu ieh shrah ha Old Lambulane, Imphal, kaba dei ruh ha High Security Zone namar ka jingdon marjan ka Secretariat bad ka Iingsah u Myntri Rangbah ka Jylla.
Kane ka jingpluh kala jia hynne ka janmiet sngi Saitjain bad kane ka Iing ka dei jong u (L) Thangkhopao Kipgen, uba dei u Chief Secretary barim ka Goa, uba la khlad noh ha ka 3 tarik Lber 2005.
Ki bahaiing hasem jong u, kila sah ha kane ka Iing tad haduh ban da khie ka thma iapher Jaidbynriew ha Manipur.
Ki Pulit pynlip ding ka Manipur bala iarap lem da ka kynhun na Thoubal District, kila shimpor da ki kynta ban lah pynlip ia ka ding.
Ka jingtohkit mynta ka dang iaid shakhmat ban lah pynthikna ia ki daw jong ka jingpluh.
