Shillong, Jylliew 14 : Ka Iingkashari Meghalaya High Court kala aipor hynriew taiew ia ka Sorkar Jylla bad ka Harijan Panchayat Committee (HPC) ba kin pynbeit ia ka kam ba sahteng kaba iadei bad ka jingpynkynriah ia ki 342 tylli ki Longiing na Them Metor, Them Iew Mawlong.
Ha ka hukum bala pynmih da u Justice W Diengdoh ha ka 13 tarik Jylliew la ong “Ki nongiasaid Ain ba mihkhmat ia baroh arliang mamla kila ai jingthoh lang ba ka jingiakren pynbeit ia kane a kam ka dang iaid hapdeng ki arliang mamla ha kaba donkam ban ai por khyndiat khynsoit namar lada ka jingpynbeit ka seisoh, kane ka kam (mukotduma) kan ym don jingmut shuh. La kyrpad ban aipor sa 6 taiew. Buh ban bishar biang ia kane ka kam hadien kata”.
Lah ban kdew ba ha ka 31 tarik Jymmang, ka HPC kala pan por 2 bnai ban thung ia u President ba thymmai ban pynbteng ia ka jingiakren bad ka Sorkar Jylla halor ka jingpynkynriah ia ki Longiing.
Kane kala jia ruh tang da ki sngi hashuwa ka jingialang ba kongsan bha bala buh ban long ha ka 7 tarik Jylliew hapdeng ka Sorkar Jylla bad ka HPC ban shim ia ka rai ba khatduh halor kane ka kam.
U Secretary ka HPC Gurjit Singh ha ka shithi bala phah sha u Symbud Myntri Rangbah ka Jylla Bah Prestone Tynsong ha ka 31 tarik Jymmang, ula ong “Nga la thoh ban kyrpad ia ka jingpynkynriah shuwa ia ka jingialang bala buh ha ka 7 tarik Jylliew, ba iadei bad ka jingshongshnong jong ngi ha Harijan Colony, Bara Bazar, Shillong”.
“Kane ka long kum ka jingpyntip ba sngewsih ba u Rangbah Shnong/President Billu Singh ula khlad noh dang shen. Ka HPC ka dang bunkam ban pynbeit bad ki bahaiing hasem ha kaban pyndep ia ka jingleh niam ba khatduh kat kum ka dustur ki Sikh ha ka iingsah jong u ha Shillong bad ruh ha ka shnong jong u ha Punjab” ong u Gurjit.
U Gurjit ha ka shithi ula ong ba hadien, kin sa pyndep ia ka jingjied/elekshon jong u Rangbah Shnong ba thymmai/President ka HPC bad ban register ia ka committee ba thymmai hapoh ka Office u Registrar of Society.
 kan ym don jingmut shuh. La kyrpad ban aipor sa 6 taiew. Buh ban bishar biang ia kane ka kam hadien kata”.){kind=link}