Dang iaid ka sorjamin ia ka surok 4 lane
Shillong, Jylliew 11: U Symbud Myntri Rangbah ka jylla ba khmih ruh ia ka PWD (Roads) Bah Prestone Tynsong hynne ka sngi Baar, ula lum ia ka jingialang bishar kam halor ka jingshna ia ki 4 tylli ki project surok da ka National Highways & Infrastructure Development Corporation Ltd (NHIDCL) ha rilum Khasi-Jaintia bad Garo.
Ki project surok ha Khasi bad Jaintia Hills ki kynthup ia ka Four Lane Road ka ban pyniasoh bad ka Panchgram, Assam bad ka Shillong Western Bypass, katba ha Garo Hills ka jingshna surok ka kynthup ia ka Dainadubi-Darogre-Williamnagar Junction Road bad ka Tura-Dalu Road.
Haba iakren bad ki nongthoh khubor hadien ba la wai ka jingialang, u Bah Prestone ula pyntip ba ka sorjamin na ka bynta ka surok Four Lane naduh na Mawlyngkhum, Umiam shaduh Panchgram, Assam, ka dang iaid shakhmat.
“Ka NHIDCL kala dep ban pyntip sha ngi ba kila iaid shakhmat ha ka sorjamin ia ki jaka bad ka committee hapoh ka jingialam u DC ka East Khasi Hills, kala treikam bha bad la lum ia ka jingialang man la ka por ioh don kano kano ka jingeh ha kaba iadei bad ka kam thied jaka” ong u Bah Prestone.
“Ha West Jaintia Hills bad East Jaintia Hills, ki Deputy Commissioner kila pynlong jingialang man la ka por ha ki district ki jongki ban pynbeit ia ki ishu kiba mih, kumba nga ong ia phi, haba ka sorjamin jaka ka dang iaid shakhmat, ngi tip mano ki trai jaka kiba pyrshah ban ai jaka ne kano ka shnong kaba pyrshah ban ai jaka bad haba mih kum kitei, ki Deputy Commissioner kin sa lum ia ki jingialang ban iakren bad ki trai jaka bad ki bor shnong ban pynbeit ia kitei ki jingeh” ong u Bah Prestone haba bynrap “Katei ka sorjamin jaka ka dang iaid shakhmat bad nga ngeit skhem ba kin pyndep noh shen ia katei ka kam bad ia ka jinglum jingkheiñ na ka bynta ban siew ia ka bai jaka”.
Ula ong ba ka Four Lane Road kadei kawei na ki projek kaba kongsan bha ia ka jylla Meghalaya.
“Kane kadei kata ka projek ia kaba ngi khot kum ka ‘North East Corridor Project’ ia kaba la dep ban kynthup ha ka Mission 2047 da ka sorkar NDA. Na ka liang ka sorkar jylla, ngi kwah ban pynthikna ba katei ka projek kan iaid beit iaid ryntih haduh ban da aiti ia ka jaka sha ka NHIDCL na ka bynta ban shna ia ka surok Four Lane” ong u Bah Prestone.
Ha kaba iadei bad ka surok Shillong Western Bypass, u Symbud Myntri Rangbah ula iathuh ba u DC ka Ri Bhoi ula sdang ban sam ia ka bai jaka sha ki trai jaka kiba la ai ia ki jaka jong ki.
“Ngi lah kynjoh ia kumba 85%, sa kumba 5-6 % mynta ka taiew, ngin sa kynjoh sha ka 90%. Ha kajuh ka lynti u DC ka East Khasi Hills ula pyntip ba ia mynta kila dep ban aiti ia ka jaka haduh 70-75 % bad hapoh kane ka taiew kin sa lah ban tam sha ka 90%” ula ong.
Ula pyntip ba shisien ba la dep ban aiti ia ka jaka kaba la kot sha ka 90%, ka NHIDCL kan sa aiti noh ia kitei ki jaka sha ki kompani ba kin sdang noh mardor iaka kam ban shna surok.
Ha kaba iadei bad ka Dainadubi-Darogre-Williamnagar Junction Road, u Bah Prestone ula ong ba katei ka projek kan sa sdang noh mardor hadien ba la pyndep iaka jingaiti ia ka jaka da ka tnad Forest na ka bynta ka Compensatory Afforestation.
Hynrei ula pyntip ba ki trai jaka kin sa aiti noh ia ka jaka jongki ha ki katto katne ki bynta kumba 2.5 km haduh 3 km ha kaba iadei bad ka Tura-Dalu Road.
“Nga la bthah ia u Deputy Commissioner ka Tura ban pynsted ia ki kam kiba sahteng bad ki trai jaka bad ka District Council khnang ba yn lah ban shimti noh ia ki jaka. Mynta ki kam ki jam kila iaid shakhmat hynrei tang ha ka bynta kaba ngim lah ban pyniaid ia ka kam namar ka kam jaka. Nga ngeit skhem ba da ka jingshim rai mynta ka sngi ngin sa lah ban pynurlong noh ia katei” la ong u Bah Prestone.
Ula pyntip ruh ba la bthah ia baroh ki Deputy Commissioner ban thaw ia ki committee ha ki District ki jongki naka bynta ban pynbeit ia ki kynrum kynram ha ka jingshna ia ki surok da ka NHIDCL.
