Shillong, Jylliew 11 : U Symbud Myntri Rangbah ka Jylla Bah Prestone Tynsong ula pyntip ba ka Sorkar Meghalaya Democratic Alliance (MDA) kan sa leit iakren shen bad ka Sorkar Pdeng ban pyntreikam noh ia ka Inner Line Permit (ILP) bad ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri India.
Haba iakren bad ki nongthoh khubor hynne ka sngi Ba-ar, u Bah Prestone ula ong “Ngin ap katto katne por bad ynda kiei kiei baroh kila biang lut, u Myntri Rangbah ka Jylla bad ma nga, ngin sa leit sha Delhi bad ngin sa iakynduh ia ki Nongialam, u Myntri Rangbah Duh, u Myntri kam Pohiing bad kiwei ki Myntri ka Sorkar India, ban pynkynmaw biang ia ki halor ki ishu ba sahteng ka Jylla kum ka ILP, ka jingpynrung ia ka Ktien Khasi bad Garo bad kiwei kiwei”.
Ha kawei ka liang, u Bah Prestone uba dei ruh u State President ka NPP, ula ther tyngeh ia u MP ka Congress na Tura Saleng A Sangma halor ka jingkynnoh ba ka MP barim Agatha K Sangma kam pat ju kren shi kyntiew ruh halor ka jingdawa ILP hapoh Parliament.
“Lehse u Saleng u dei uba dang shu shah jied dang ha kine ki khyndiat sngi, ngam tip nangno u ioh ia kine ki jingtip la ka Agatha ka kren ne em ia ka ishu hynrei ka jingbthah da ka Party la ka dei u MP Rajya Sabha ne Lok Sabha, ki dei ban kren ia kane ka ishu bad ka Sorkar India la ka dei hapoh ka Parliament ne ha ka kyrdan jong ka Sorkar” ula ong.
