Shillong, Nailar 10: U National Vice President ka NPP bad Symbud Myntri Rangbah ka Jylla Bah Prestone Tynsong hynne ka sngi balang, ula ai jingmut ia ki MLA ka All India Trinamool Congress (AITC) ban leit pyniasoh noh sha ka Bharatiya Janata Party (BJP) hashuwa ka elekshon MLA 2023 ban long ha Jylla.
“Nga tharai ki (AITC) donkam ban iasoh noh bad ka BJP, kan bha shibun eh ia ki. Kan bha shisha lada ki leit iasoh BJP shuwa ka elekshon” ong u Bah Prestone haba iakren bad ki nongthoh khubor haba jubab ia ka jingkylli halor ka jingwan rung ka AITC sha ka kam sain pyrthei ka Jylla.
U Bah Prestone ula ong “Lada u Dr Mukul Sangma bad Bah Charles Pyngrope ki kwah ia ka jingai jingmut ong nga, ngi lah ban iashong bad ki bad ngin sa ai ka jingaimut ba shuwa ka elekshon ba kin iasoh noh sha ka BJP” ula ong.
Haba kyntait ban kdew ia ki daw halor kane ka jingai jingmut ba syndet syndet, u Bah Prestone ula ong “Balei ba ngan da batai bniah ia ka…ngam tip hynrei nga la ong ba shuwa ka elekshon,kan bha ia ki ban leit iasoh sha ka BJP”.
Une u Nongialam ka NPP ula ong ba ka jingbatai lypa jong u Dr Mukul Sangma ia ka elekshon MLA 2023 kan long da u nod uba heh bha.
“Nga tharai phi kynmaw bha, ia ka jinglong Myntri Rangbah u Dr Mukul naduh u snem 2010 haduh 2018. Hadien u 2010, ula leit sha ka elekshon MLA 2013, ka jingbatai lypa jong u kala urlong shisha, 2013-2018 ka jingbatai kala pulom, 2018-2023 kala poi sha u nod” ula ong.
